17.02.2026, 10:17 32
- Azərbaycan iqtisadiyyatında artım tempi 2025-ci ildə zəifləyib, lakin 2026-cı ildə yenidən sürətlənəcəyi proqnozlaşdırılır.
Bu barədə beynəlxalq sığorta və aktivlərin idarəedilməsi şirkəti olan "Allianz Group"dan bildirilib.
Qeyd edilib ki, Azərbaycanın iqtisadi dinamikası 2024-cü ildəki 4,1%-dən 2025-ci ildə təxminən 1,6%-ə qədər yavaşlayıb. Bununla belə, təbii qaz ixracının və qeyri-neft sektorunun genişlənməsi hesabına artımın 2026-cı ildə 2,6%-ə qədər yüksələcəyi proqnozlaşdırılır.
2025-ci ildə inflyasiya 5,6%-ə yüksəlib. Bu artım əsasən ərzaq məhsulları və xidmətlər sektorunda qiymət artımları ilə bağlı olub. Bununla belə, inflyasiya hələ də Mərkəzi Bankın 4% ±2 faiz bəndi hədəf diapazonu daxilində qalır.
"Allianz" vurğulayıb ki, manat güclü valyuta ehtiyatlarının dəstəyi ilə sabitliyini qoruyur. Lakin xarici risklər davam edir. Qlobal enerji qiymətlərində dəyişkənlik, ticarət pozuntuları və regional geosiyasi gərginliklər iqtisadi bərpanı zəiflədə bilər.
"Daxili tələbat əməkhaqqı artımının yavaşlaması və istehlakçıların ehtiyatlı davranışı səbəbindən məhdudlaşır. İnvestisiya artımı isə, xüsusilə karbohidrogen sektorunda, zəif olaraq qalır. 2026–2027-ci illər üzrə perspektivlər şaxələndirmənin sürətindən, qeyri-neft sektorlarının dayanıqlığından və qlobal əmtəə bazarlarında sabitliyin qorunmasından asılı olacaq" - "Allianz" əlavə edib. (APA)
