• Azad atasız böyümüşdü. Çətinliyin nə demək olduğunu o uşaqlıqdan bilirdi. 9-cu sinifi bitirib ailəsinə dəstək olmuşdu. Azad anasını çox sevirdi, bacısının qayğısına qalırdı. Maşın qəzasına düşdüyünə görə onu hərbi xidmətə gec apardılar. Amma o tezliklə Vətənə əsgər olmaq istəyirdi. Deyirdi, hərbi xidmətdən qayıdım, ana, sənə hər cür şərait yaradacam. İşdən evə gələndə anasını qucaqlayırdı, səni çox istəyirəm, ana, deyirdi. Onları əziyyətlə böyüdən anasının bundan sonra qayğısız olmasını istəyirdi. Müharibəyə gedəndə də ona bildirmək istəmirdi. Amma bir dəfə cəbhədən anasından hallalıq istədi, dedi ki, həyatın işini bilmək olmaz. Azad evdə, ətrafında, iş yerində özünə hörmət qazanmışdı. Anası deyir ki, oğlum namaz qılırdı, siqaret çəkmirdi, o mənim ağıllı balam idi. Mənim 50, özünün 25 yaşını qeyd etmək arzusundaydı. Bala, mən səninlə fəxr edirəm!

Bu gün Şanlı Vətən Müharibəsinin qəhrəman şəhidi Məmmədov Azad Tahir oğlunun doğum günüdür. O, 16 dekabr 1995-ci ildə Bakı şəhərində anadan olub. Orta təhsilini Nəsimi rayonundakı 152 saylı məktəbdə alıb. 2019-cu ildə hərbi xidmətə yollanıb.

Azərbaycan Ordusunun əsgəri olan Azad Məmmədov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Füzuli və Xocavənd rayonları uğrunda gedən döyüşlərdə mərdliklə vuruşub.

Azad Məmmədov oktyabrın 18-də Füzuli uğrunda gedən qanlı döyüşlərdə qəhrəmancasına şəhadətə ucalıb.
Azərbaycan Respublikasının ərazi bütövlüyü uğrunda aparılan döyüş əməliyyatlarında iştirak etdiyi və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikasının Prezidenti İlham Əliyevin müvafiq sərəncamlarına əsasən Məmmədov Azad ölümündən sonra "Vətən uğrunda", "Xocavəndin azad olunmasına görə" və "Füzulinin azad olunmasına görə"medalları ilə təltif edilib.

Cənnətdki doğum günün mübarək, məzarın nurla dolsun, ruhun şad olsun, qəhrəman şəhidim!

Mina RƏŞİD