26.11.2025, 17:19 211
- "Ermənistan faktiki olaraq, Kollektiv Təhlükəsizlik Müqaviləsi Təşkilatından (KTMT) çıxıb".
"Vətən səsi" xəbər verir ki, bunu Ermənistan parlamentinin sədri Alen Simonyan bu gün keçirilən brifinqdə ölkəsinin KTMT-dən çıxması ehtimalı ilə bağlı suala cavabında bildirib. O, jurnalistlərlə söhbətində qeyd edib ki, Ermənistan üçün KTMT-dən çıxmaq siyasət meydanında anti-Rusiya mövqeyində olmaq demək deyil: "Əgər hansısa quruma, məsələn, Jurnalistlər İttifaqına üzv olursunuz və həmin qurum öz öhdəliklərini yerinə yetirmirsə, siz də oradan çıxmaq istəyirsinizsə, indi bu o deməkdir ki, siz həmin ittifaqa qarşısınız?".
Ermənistan parlamentinin spikeri İrəvanın niyə rəsmi şəkildə KTMT-dən çıxmaması ilə bağlı sualı da cavablandırıb: “Faktiki olaraq, çıxmışıq. Qalan məsələlər isə bizim siyasi məqsədəuyğunluğumuz və danışıqlarımızla bağlıdır".
Xatırladaq ki, Ermənistan KTMT-yə üzv ölkələrin sabah Bişkekdə keçiriləcək sammitində iştirakdan imtina edib. Amma İrəvan toplantıda razılaşdırılacaq sənədlərə etiraz etməyəcək. Bununla belə, Ermənistan xarici işlər nazirinin müavini Mnatsakən Səfəryan bundan öncə jurnalistlərlə söhbətində söyləmişdi ki, Ermənistan hazırkı mərhələdə KTMT-dən çıxma məsələsini nəzərdən keçirmir. Halbuki, rəsmi İrəvan 2020-ci ilin payızından təşkilata üzvlükhaqqı ödəmir və Baş nazir Nikol Paşinyan 44 günlük müharibədən sonra dəfələrlə ölkəsinin KTMT fəaliyyətində iştirakını dayandırdığını bəyan edib.
Elxan SALAHOV
