06.11.2022, 10:10 591
- Mədəniyyət Nazirliyinin dəstəyi, yazar Nigar Həsənzadənin təşəbbüsü ilə həyata keçirilən “Söz” ədəbi layihəsinin “İgidlərin sözü” adlı antologiyası işıq üzü görüb. Topluda Vətən müharibəsi iştirakçılarının şeirləri, esseləri yer alıb. Kitabın ideya müəllifi Nigar Həsənzadə, redaktoru Aida Eyvazlı Göytürkdür.
Oxucular yeni antologiyada Aprel şəhidləri Nazim Şamaxılı, Mikayıl Vahabzadə, Mirsalam Cəfərov, II Qarabağ şəhidləri polkovnik-leytenant Elzamin Təhməzov, baş gizirlər Mehman Yusifov, Saleh Əliyev, Kərim Əhmədbəyli, əsgər şəhidlər Şahgündüz Cabbarov, Xəyyam Hüseynov, Murad Nəbiyev, Vətən müharibəsi iştirakçıları Vüsal Hətəmov, Kərəm Aydın, Emin Piri, Sərxan Yolçuyev, Həsən Kür, Orxan Səlifov, Cavid Əlioğlu, Tofiq Əhməd, Eyvaz Əyyub, Səbuhi Qurbanov, Elvin İntiqamoğlu, Oğuz Alparslan, Nicat Ağayev və Tamerlan Əsədovun əsərləri ilə tanış olacaqlar.
Qeyd edək ki, layihənin həyata keçirilməsində məqsəd 44 günlük Vətən müharibəsində vətənimizin ərazi bütövlüyü uğrunda mübarizə aparan igid oğulların yaradıcılıq nümunələrini nümayiş etdirməkdir. Kitabın təqdimatı noyabrın 11-də Beynəlxalq Muğam Mərkəzində keçiriləcək.
Mina RƏŞİD
