• Ulu Öndər Heydər Əliyev tərəfindən əsası qoyulan və bu gün Prezident İlham Əliyev və ölkənin Birinci vitse-prezidenti Mehriban xanım  Əliyeva tərəfindən uğurla davam etdirilən dövlət siyasəti gənclərimizin  hərtərəfli inkişafına, onların istedad və bacarıqlarının reallaşmasına xidmət edir. Bu siyasətin bəhrəsi kimi Azərbaycan gəncləri hərtərəfli inkişaf edir və böyük uğurlara imza atırlar.

Belə gənclərdən biri də IX “Muğam” Televiziya Müsabiqəsinin finalçısı, “İlin Gənci” mükafatçısı Yusif Cəfərbəylidir. O, həm musiqi, həm də iqtisadiyyat sahəsində təhsil alaraq, elm və sənətin vəhdətini yaradan, milli musiqimizi beynəlxalq səviyyədə tanıdan istedadlı gəncdir. Yusif Cəfərbəyli bu günlərdə  “İki sahil” qəzetinə maraqlı bir müsahibə verib. O, gənclərə göstərilən dövlət dəstəyindən, milli musiqimizin təbliği, Laçına qayıdışın yaratdığı duyğular və sənət yolundakı axtarışlarından danışıb.

Qeyd edək ki, Yusif Cəfərbəyli 2017-2021-ci illərdə Azərbaycan Dövlət İqtisad Universitetində “Dünya iqtisadiyyatı” ixtisası üzrə bakalavr təhsili, 2021-2023-cü illərdə isə Azərbaycan Dövlət Mədəniyyət və İncəsənət Universitetində (ADMİU) Menecment (musiqi sahəsi üzrə) ixtisasında magistr təhsili alıb. Gənc istedad deyir ki, təhsil aldığı bu sahələrin hər biri onun üçün çox əhəmiyyətli və gərəklidir. İqtisadiyyat hər bir ölkə üçün ən vacib sahələrdəndir. Xalqımızın Ümummilli Lideri Heydər Əliyev əbəs yerə bu fikri səsləndirməyib ki, "İqtisadiyyatı güclü olan dövlət hər şeyə qadirdir". Yusif  “Azərbaycan milli musiqi potensialının tanınmasında müasir menecment metodlarından istifadə” mövzusunda magistr dissertasiya işini müdafiə edib. Gənc alim düşünür ki, nə yaxşı belə fərqli və maraqlı sahələri seçib.

“İlin Gənci” mükafatçısı

Qeyd edək ki, “İlin Gənci” mükafatı 2 Fevral – Azərbaycan Gəncləri Günü münasibətilə müxtəlif sahələr üzrə fərqlənən, ölkəmizin ən uğurlu və fəal gənclərinə təqdim olunan, Azərbaycan Respublikasının Gənclər və İdman Nazirliyi tərəfindən təsis edilmiş mükafatdır. Yusif də sevinir ki, bu il bir gənc kimi həmin mükafata layiq görülüb. Deyir ki, hər bir mükafat, hər bir təltif insanın əməyinə verilən böyük dəyərdir, motivasiyadır. Eyni zamanda yeni uğurların başlanğıcı, təməlidir.

Dövlətimizin başçısı gənclərə böyük inam bəsləyir

Yusif bildirir ki, bu gün ölkəmizdə səmərəli və məqsədyönlü dövlət gənclər siyasəti uğurla davam etdirilir. Ulu Öndər Heydər Əliyev tərəfindən əsası qoyulmuş bu siyasət Azərbaycan gəncliyinin fiziki, mənəvi və intellektual inkişafını təmin edib. Ulu Öndər Heydər Əliyevin siyasi məktəbinin yetirməsi olan Azərbaycan Prezidenti İlham Əliyev bu meyarları nəzərə alaraq ölkəmizin qüdrətli dövlətə çevrilməsi naminə gənclərə böyük inam bəsləyir, onlara yüksək şərait yaradılması istiqamətində Dövlət proqramları qəbul edilir. Ümumilikdə bu gün Azərbaycan gənclərinin hərtərəfli inkişafı üçün dövlətimiz tərəfindən hər bir şərait yaradılıb.

Yusifin muğam dünyası

Yusif deyir ki, uşaqlıqdan evlərində həmişə milli musiqimizə maraq olduğunu görüb. Ona görə də valideynləri bu yolda ona böyük dəstək göstərib. O, qeyd edir ki, muğam şifahi ənənəvi musiqidir. Muğamı daha mükəmməl öyrənmək üçün gərək bütün ustadları dinləyəsən və onların hər birindən bəhrələnəsən. O cümlədən, mən də klassik muğam ifaçılarından başlamış müasir dövr xanəndələrinə qədər hər kəsi gündəlik olaraq dinləyirəm, onların ifalarından nələrsə öyrənməyə çalışıram. Yusif xüsusi olaraq müəllimlərinin adlarını qeyd etməyi özünə mənəvi bir borc bilir. Deyir ki, onların mənim üzərimdə zəhmətləri çox böyükdür. Onun ilk muğam müəllimi Niyazi adına 22 saylı musiqi məktəbində Kamilə xanım Abdullayeva olub. Hazırda isə Əməkdar artist, Milli Konservatoriyasının dosenti Təyyar Bayramovdan muğam sənətimizin sirlərini öyrənir.

Laçında çıxış etmək ən böyük xəyalım idi...

Yusif əslən Laçın rayonundandır, XVIII əsrdə Zəngəzurun tanınmış bəylərindən olan Həmzə Sultan bəy Qaraçorlu nəslindəndir. Valideynləri də bu gözəl torpaqda doğulub boya-başa çatıblar. Deyir ki, hamıya çox yaxşı bəllidir ki, ümumiyyətlə, Qarabağ, Şərqi Zəngəzur bölgələrinin insanları milli musiqiyə, muğam sənətinə, aşıq yaradıcılığına bağlı olurlar. Bu torpaqlar Azərbaycan mədəniyyətinə böyük sənət fədailəri, musiqiçilər, bəstəkarlar, xanəndələr və s. bəxş edib.

Yusif deyir ki, muğam müsabiqəsində Laçında çıxış etməyim həm ifaçı, həm də bir laçınlı kimi mənim ən böyük xəyalım idi. Laçın mənim hər zaman arzularımın ünvanı olub. Uşaqlıqdan doğma yurdum Laçını görmək ən böyük arzumdu və mən inanırdım ki, bu xəyalım gerçək olacaq. Uca Allaha bəlkə hər gün şükür edirəm ki, Müzəffər Ali Baş Komandanımız İlham Əliyevin rəhbərliyi ilə, müqəddəs şəhidlərimizin qanı, canı bahasına biz bütün işğal altında olan torpaqlarımız kimi, Laçına da qovuşduq. IX “Muğam” Televiziya Müsabiqəsinin finalı ilk dəfə Laçında keçirildi. Mən də özümü çox xoşbəxt, qürurlu hesab edirəm ki, bir finalçı kimi öz doğma vətənimdə səhnəyə çıxdım, “Qarabağ” mahnısını şövqlə ifa etdim. Doğrudur, Laçın azad olunandan sonra dəfələrlə Laçına getmişəm, hətta qohumlarım, əzizlərim artıq Laçında yaşayırlar. Ancaq bu dəfə müsabiqənin finalçısı kimi Laçına getmək, doğma Laçında səhnəyə çıxmaq daha gözəl, həm duyğulu, həm sevincli hisslər idi. Düşünürəm ki, ən böyük qalibiyyət isə insanların sevgisini, məhəbbətini qazanmaqdır və mən əminəm ki, buna nail olmuşam. Xüsusi olaraq da bu layihənin ərsəyə gəlməsində ölkəmizin Birinci vitse-prezidenti, Heydər Əliyev Fondunun prezidenti, çox dəyərli Mehriban xanım Əliyevaya sonsuz minnətdarlığımı bildirirəm.

Onun səsi şəhid anasını ağlatdı...

Yusif deyir ki, məni daha çox duyğulandıran doğma yurdlarımızın düşmən işğalında olması idi. İndi isə çox şükürlər olsun ki, artıq kədərimiz, qəmimiz, qüssəmiz də Qələbə, Zəfər sevinci ilə əvəz olunub. Bu günləri bizlərə yaşadanlara minnətdarlığımız sonsuzdur. Mən hər zaman oxuyanda deyirlər ki, sənin səsində bir nisgil, yanğı, məlahət hiss olunur. Bu da insanların ürəyinə toxunur. Elə IX “Muğam” Televiziya Müsabiqəsi zamanı bir məqamı qeyd etmək istəyirəm, müsabiqənin ilk həftələrində çıxışım zamanı, xüsusən də “Segah” muğamını ifa etdiyim zaman, 2016-cı ilin Aprel döyüşlərində şəhid olmuş Əbdülməcid Axundovun anası Ceyran xanım Həsənova da zalda idi. Mənim ifama onun ağlaması məni də çox duyğulandırdı. Allah bütün şəhidlərimizə rəhmət eləsin...

Muğamlarımız çox gözəldi!

Yusifin fikrincə muğamlarımızın və xalq mahnılarımızın hər biri ayrı-ayrılıqda çox gözəldir. Deyir ki, hansı muğamı ifa edirsən et, muğamlarımızın hər birinin insana bağışladığı özünəməxsus təsir var. Hətta dahi Üzeyir Hacıbəyli də öz əsərlərində klassik Azərbaycan muğamlarını ifa xüsusiyyətlərinə görə aşıladığı əhvali-ruhiyyəni səciyyələndirib. Mənə görə də bütün muğamlar gözəldir və əsas olan odur ki, ifa etdiyin muğamın halını dinləyiciyə ötürə biləsən.

Mən səhnəyə çıxanda...

Yusifin dediyinə görə, səhnə heç də göründüyü kimi asan yer deyil. Səhnəyə çıxanda istər-istəməz insanda həyəcan da olur, gərginlik də, səsdə problem də ola bilər, hətta ifa zamanı söz də yaddaşından çıxa bilər və s. Ancaq əsas olan odur ki, sən peşəkar və hazırlıqlısansa səhnədə bütün vəziyyətləri idarə etməyi bacarasan. Səhnəyə çıxmazdan öncə isə, xüsusilə də müsabiqə dönəmində gərək psixoloji cəhətdən də özünü səhnəyə hazırlayasan, özünə inamlı olasan. 

Ölkəmizi dünyada təmsil edirəm...

Xaricdə Azərbaycan musiqisinə maraq çox böyükdür. Yusif deyir ki, mən qardaş Türkiyədə keçirilən bir sıra tədbirlərdə iştirak edərək milli musiqimizi təqdim etmişəm. 2019-cu ilin "Nəsimi ili" elan olunması münasibətilə UNEC Yaradıcılıq Mərkəzi ilə birgə Türkiyənin paytaxtı Ankara şəhərində keçirilən tədbirdə, 2021-ci il oktyabr ayında Azərbaycan Respublikasının Gənclər Fondu, Naxçıvan Muxtar Respublikasının Gənclər Fondu və Türkiyə Gənclik Vəqfinin (TÜGVA) birgə təşkilatçılığı ilə Türkiyənin Qaziantep şəhərində keçirilən "Beynəlxalq Zəfər Düşərgəsi"ndə, Türkiyənin İstanbul şəhərində "Azərbaycan-Türkiyə-Pakistan Gənclərinin Birinci Həmrəylik Forum"unda muğamlarımızı, milli musiqilərimizi səsləndirmişəm. Bu yaxınlarda isə Qazaxıstanın Almatı şəhərində "Almatı: Türk Dünyası Gənclər Paytaxtı 2025"in açılış mərasimində türk dövlətləri içərisində mən də öz çıxışımla ölkəmizi təmsil etdim.

Dünyanın ən gözəl səhnəsi Qarabağdır!

Yusif bildirir ki, ona görə Qarabağ səhnəsi dünyanın ən gözəl səhnəsidir. Özümü çox bəxtəvər sayıram ki, doğma Qarabağda dəfələrlə səhnəyə çıxmışam və gələcəkdə Qarabağ və Şərqi Zəngəzur səhnələri üçün daha böyük ideyalarım var. İnşallah, bu arzular da gerçək olar.

Yusifin yaşıdlarına tövsiyəsi

Yusif bir gənc olaraq yaşıdlarına tövsiyə edir ki, onlar ilk olaraq doğma Vətənimizi, odlar yurdu Azərbaycanımızı ürəkdən sevsinlər. Öz üzərlərində daha çox çalışaraq, bilik və bacarıqlarını artıraraq xalqımız və dövlətimiz üçün faydalı olsunlar.

Yusif bütün gənclərə uğurlar arzulayır.

Biz də Yusifə gələcək həyatında daha böyük uğurlar və səadət arzulayırıq.

Mina RƏŞİD