10.03.2023, 15:27 246
Haqqında söhbət açdığımız qəhrəmanımız 12 dekabr 1998-ci ildə Füzuli rayonunun Böyük Bəhmənli kəndində anadan olmuş Sevindik Fedya oğlu Şirinovdur. O, öz doğma kəndində, Füzuli rayonu, 1 saylı tam orta məktəbində orta təhsil almışdır. Sevindik orta məktəbi bitirdikdən sonra həqiqi hərbi xidmətə çağırılmış, Quru Qoşunlarında xidmət etmişdir. Xidmət dövründə özünü nümunəvi əsgər kimi tanıtdıra bilmişdir. Hərbi işə olan xüsusi həvəs onu tərxis olunduqdan sonra yenidən MAHHXHQ kimi hərbi xidmətə qayıdır. İşğal altında olan torpaqlarımızın azad olunması, hamı kimi, onun da böyük arzusu idi. Belə bir zaman yetişdi, düşmənin növbəti təxribatı onun öz başında çatladı. Azərbaycan Respublikası Silahlı Qüvvələrinin Ali Baş Komandanı cənab İlham Əliyevin əmri ilə Şanlı Ordumuz əks həmlə əməliyyatına başladı. Cəmi 44 gündə ilanın başı əzildi. Bu şərəfli döyüşlərdə S.Şirinov da qəhrəmanlıq göstərdi. O, Füzuli, Xocavənd, Cəbrayıl rayonlarının azad olunmasında igidlik göstərmişdir. Azərbaycan Respublikasının Prezidenti cənab İlham Əliyevin sərəncamı ilə Sevindik Şirinov "Füzulinin azad olunmasına görə", "Cəbrayılın azad olunmasına görə", "Xocavəndin azad olunmasına görə" medalları ilə təltif olunmuşdur. Ailəlidir, III dərəcəli əlildir.
İsa MUSAYEV
