21.11.2025, 10:19 226
- Tale gənc yaşlı bacısını, 16 yaşı olanda isə atasını itirmişdi. Anası deyir ki, oğlu heç bir çətinlikdən qorxmurdu. Murovdağda Vətənə xidmət etmişdi. Vətən müharibəsi başlayanda o buna çoxdan hazır idi. Oktyabrın 5-də ailəsi ilə sonuncu dəfə danışıb və tezliklə gələcəyini söyləmişdi. Tale döyüşlərə qatılanda onun 3 aylıq körpəsi vardı. Birinci övladını itirdikdən sonra Mərd dünyaya gəlmişdi. Tale buna görə övladına çox bağlı idi, həmişə doğmaları ilə danışanda onlara balasını tapşırardı...
Bu gün Şanlı Vətən Müharibəsinin qəhrəman şəhidi Tale Qədir oğlu Şirinovun doğum günüdür. O, 21 noyabr 1996-cı ildə Qəbələ rayonunun Çuxur Qəbələ kəndində anadan olub. 2003-cü ildə Çuxur Qəbələ kənd Ə.Məmmədov adına tam orta məktəbin 1-ci sinfinə daxil olub. Orta təhsilini həmin məktəbdə başa vurub. 2015-2016-cı illərdə Azərbaycan Silahlı Qüvvələrində müddətli həqiqi hərbi xidmət keçib. Həqiqi hərbi xidmətini Murovdağda kiçik çavuş olaraq bitirib.
Azərbaycan Ordusunun kiçik çavuşu olan Tale Şirinov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsində döyüşlərə qatılıb. O, Talış kəndi və Suqovuşan yaşayış məntəqəsinin azad olunması uğrunda gedən döyüşlərdə mərdliklə vuruşub. Oktyabrın 6-da elə həmin yaşayış məntəqələrinin azad olunması uğrunda gedən döyüşlərdə qəhrəmancasına şəhadətə ucalıb.
Azərbaycan Respublikasının Prezidenti İlham Əliyevin müvafiq sərəncamlarına əsasən Tale Şirinov ölümündən sonra "İgidliyə görə”, "Laçının" azad olunması”, "Suqovuşanın" azad olunması” və “Vətən uğrunda” medalları ilə təltif edilib.
Cənnətdəki doğum günün mübarək, məzarın nurla dolsun, ruhun şad olsun, qəhrəman şəhidim!
Mina RƏŞİD
