13.03.2024, 10:02 335
- Bu gün Vətən müharibəsi şəhidi Səmural Fətəliyevin doğum günüdür. Yaşasaydı, Səmuralın bu gün 27 yaşı olacaqdı...
Səmural Ayaz oğlun Fətəliyev 1997-ci il martın 13-də Quba rayonunun Əlibəyqışlaq kəndində anadan olmuşdur. 2003-cü ildə Quba rayonu Əlibəyqışlaq kəndində yerləşən Musa Qonaqov adına tam orta məktəbin 1-ci sinfinə getmiş, 2012-ci ildə həmin məktəbin 9-cu sinfini bitirmiş və daha sonra Quba şəhəri Azad Məmmədov adina 2 saylı liseyə daxil olub təhsilini orada davam etdirmişdir.
Səmural Fətəliyev kiçik yaşlarından taekvondo idman növü ilə də məşğul olmuşdur. 15-16 avqust 2003-cü ildə Azərbaycan Respublikası Qusar şəhərində keçirilmiş taekvondo üzrə 20 kq çəkidə 3-cü yeri tutmuşdur.
Səmural Fətəliyev 2014-cü ildə Azərbaycan Memarlıq və İnşaat Universitetinin Tikinti-İqtisad fakültəsinin "Sənayenin təşkili və idarə edilməsi" ixtisasına daxil olmuş və 2018-ci ildə həmin universiteti bitirmişdir.
Səmural Fətəliyev universitetdə oxuduğu müddət ərzində bir çox sahələrdə könüllü kimi iştirak etmiş və nailiyyətlər əldə etmişdir.
Uşaqlığından Vətən sevgisi ilə böyüyən Səmural Vətənə borcunu da ödədi. Canını Vətən uğrunda düşmən gülləsinə sipər edərək adını şanlı tariximizə yazdı...
Səmural Fətəliyev Vətən müharibəsinə könüllü yollanıb. 2020-ci oktyabrın 5-də Füzuli rayonunun Seyidəhmədli kəndi istiqamətində gedən şiddətli döyüşlərdə qəhrəmancasına şəhid olub. Şəhidin nəşi həmin ayın 9-da doğulduğu Quba rayonu Əlibəyqışlaq kəndinə gətirilib və kənd qəbiristanlığında böyük ehtiram və izdihamla dəfn edilib.
Səmural Fətəliyev ölümündən sonra "Vətən uğrunda", 'Fizulinin azadlığına görə" medalları ilə təltif edilib.
Allahdan şəhidimizə rəhmət diləyirik.
Tahirə AĞAMİRZƏ
