30.05.2023, 09:00 281
- Bu gün Vətən müharibəsi qəhrəmanlarından olan Şəhid əsgər Kənan Vəfadar oğlu Məmmədlinin doğum günüdür. O, 2002-ci il mayın 30-da Qax rayonunun Tasmalı kəndində anadan olub. Tasmalı kənd tam orta məktəbini bitirib 2017-ci ildə Qax Peşə Litseyinə daxil olub. 2020-ci ilin iyulunda həqiqi hərbi xidmətə cağırılıb.
2020-ci il sentyabrın 27-də Vətən Müharibəsi başlananda Kənan da bir əsgər kimi Ordu sıralarında vuruşub. Sentyabrın 30-da Suqovuşanın Çaylı kəndi istiqamətində gedən döyüşlərdə qəhramancasına şəhadətə ucalıb.
Şəhidimiz doğma Qax rayonunda böyük izdiham və ehtiramla torpağa tapşırılıb.
İgid əsgər Kənan Məmmədli ölümündən sonra Müzəffər Ali Baş Komandan İlham Əliyevin sərəncamları ilə “Vətən uğrunda”, "İgidliyə" görə, "Laçının azad olunmasına görə" və "Suqovuşanın azad olunmasına görə" medalları ilə təltif edilib.
Bu gün Kənan kimi oğullarla nəinki doğmaları, əzizləri, bütün Azərbaycan fəxr edir. Çünki onlar Zəfər tariximizi öz qanları ilə yazdılar...
Cənnətdəki doğum günün mübarək, məzarın nurla dolsun, Kənan balamız!
Mina RƏŞİD
