14.01.2026, 12:58 230
- Qarabağ silsiləsinin cənub-şərq yamacında yerləşən Çapar kəndi Ağdərə rayonunda keçmiş məcburi köçkünlərin məskunlaşdığı yaşayış məntəqələrindəndir. Azərbaycan Silahlı Qüvvələrinin 2023-cü ildə həyata keçirdikləri antiterror əməliyyatı nəticəsində azadlığına qovuşan kənddə evlərin bərpası ilə yanaşı, infrastruktur layihələri də həyata keçirilir.
Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidmətinin İctimaiyyətlə əlaqələr şöbəsinin müdiri Afət Telmanqızı bildirib ki, Çapar kəndində mövcud olan fərdi evlərin sayı 104-dür. Onlardan da 41-i yararsız, 63-ü isə qismən yararlıdır. Evlərdən 40-ı artıq istismara hazırdır. İl ərzində daha 23 ev bərpa ediləcək. İlkin olaraq kəndə 26 ailə (96 nəfər) qayıdıb.
Burada sosial məsələlərin həlli ilə bağlı bir çox iş görülüb. Belə ki, 3 ədəd mövcud transformator və elektrik xətti bərpa edilib, yeni elektrik, qaz və rabitə xətləri çəkilib, su şəbəkəsi yaradılıb, su anbarları bərpa olunub. Uzunluğu 6 kilometrə yaxın olan kənddaxili yollar yenidən qurulub. Kənddə yeni salınmış park da sakinlərin istifadəsinə veriləcək. Kəndə qayıdan sakinlərin məşğulluğu diqqət mərkəzində saxlanılır, sahibkarlıq fəaliyyəti üçün şərait yaradılır.
Xatırladaq ki, Prezident İlham Əliyev yanvarın 13-də Ağdərə rayonunun Çapar kəndində görülmüş işlərlə tanış olub. (AZƏRTAC)
