15.09.2023, 16:53 188
- Rusiya prezidentinin mətbuat katibi Dmitri Peskovun Bakı və İrəvana təmkin göstərməyə çağırışında diqqətçəkən bir neçə cümlə var ki, politoloq Elxan Şahinoğlu bu məqama aydınlıq gətirib: "Peskov “tərəfləri iki il əvvəl imzalanmış həmin üçtərəfli sənədlərin ruhunda hərəkət etməyə çağırırıq”, - deyib. Politoloq bildirib ki, Rusiya prezidentinin mətbuat katibinin sonrakı cümləsi isə belədir: “Təbii ki, o vaxtdan bəri ortaya çıxan yeni reallıqları nəzərə alaraq”.
"Birincisi, 44 günlük savaşa son verən üçtərəfli sənəd iki il deyil, 2020-ci ilin noyabrında imzalanıb, təxminən ay yarımdan sonra 3 ili tamam olacaq. Peskov unudub, yoxsa bilərəkdən sənədin imzalanma tarixini “cavanlaşdırıb”?.
Biz həmin tarixin qısa müddətdə geridə qalmasını istəyirik ki, Rusiya hərbi kontingenti ərazimizi tez tərk etsin: "Peskovun “yeni reallıqlar nəzərə alınmalıdır” açıqlamasını isə belə yozmaq olar ki, Ermənistan Laçın yolunda sərhəd məntəqəsinin reallığı ilə barışmalıdır. Çünki Ermənistan rəsmiləri daima Kremli bu məsələyə görə tənqid edirlər. Bu isə Rusiya və Ermənistanın qəbul edəcəyi reallıqlardan yalnız biridir, növbəti reallıqlar Ağdam-Xankəndi yolunun daimi istifadəyə açılması, separatçıların tərksilahı və Qarabağ ermənilərinin Azərbaycan qanunları ilə yaşamaları olmalıdır",- deyə politoloq fikrini tamamlayıb.
Hazırladı: Tahirə AĞAMİRZƏ
