18.11.2025, 07:34 257
- Dilin saflığı və təmizliyi ilk növbədə o dildə danışan insanların məsuliyyətindən asılıdır. Bu məsələdə isə qəzetlər, jurnallar, kitablar, televiziya, radio və müasir internet platformaları ön sırada dayanır. Yazılı mətbuat dilin zəngin və səliqəli yazı nümunələrini yaradırsa, şifahi media dilin işləkliyini, təmizliyini və düzgünlüyünü geniş auditoriyaya çatdırır.
Bunu açıqlamasında Əməkdar jurnalist, ictimai xadim və professor Qulu Məhərrəmli söyləyib.
Professorun fikrincə, son illərdə dilin tətbiq dairəsi xüsusilə sosial şəbəkələrdə genişləndikcə, dil qaydalarının pozulması, ədəbi norma və üsluba biganəlik daha çox nəzərə çarpır. “İstifadəçilərin dil bilgisi müxtəlif səviyyədə olduğuna görə, dilə yad elementlərin, yersiz söz və ifadələrin daxil olması dilin saflığına ciddi zərər vurur”,- deyə Q.Məhərrəmli bildirib.
Problemi şərh edən Əməkdar jurnalist deyib: “Media qurumlarının redaksiya siyasətində dil və üslub məsələlərinə xüsusi diqqət ayrılmalıdır. Peşəkar kadrların, xüsusilə redaktorların, korrektorların, üslub mütəxəssislərinin fəaliyyəti bu sahədə böyük əhəmiyyət daşıyır. Faktların düzgünlüyü, sözlərin yerində və dəqiq işlədilməsi, üslubda ardıcıllıq və aydınlıq media mətnlərinin keyfiyyətini təmin edən əsas amillərdir. Mediada çalışan hər bir şəxsin yüksək dil biliyinə sahib olması vacibdir. Dilin normalarına riayət edilməsi, sözlərin öz yerində işlədilməsi, fikrin dəqiq, aydın və anlaşıqlı şəkildə ifadəsi həm peşəkarlığın göstəricisidir, həm də cəmiyyətə nümunədir. Müşahidə olunan dil nöqsanlarının böyük hissəsi ana dilinin qaydalarını, yazı normalarını və şifahi nitq xüsusiyyətlərini lazımi səviyyədə bilməməkdən irəli gəlir. Bunun isə yeganə həlli yolu var. Dili yaxşı öyrənmək, düzgün danışmaq, səliqəli yazmaq və fikri aydın şəkildə ifadə etmək. Dilin saflığının qorunması hər birimizin məsuliyyətidir”. (AZƏRTAC)
