• Bu gün tanınmış teatr və kino aktrisası, Azərbaycan Respublikasının Xalq artisti, Qərbi Azərbaycan İcmasının üzvü Elmira Məhərrəm qızı İsmayılovanın doğum günüdür.

Elmira İsmayılova 1945-ci ildə İrəvan şəhərində anadan olmuşdur. İrəvanda Pedaqoji İnstitutu bitirdikdən sonra 1968-ci ildən C.Cabbarlı adına İrəvan Dövlət Azərbaycan Dram Teatrında aktrisa vəzifəsində işləyir.

E.İsmayılova aktrisa kimi fəaliyyət göstərdiyi illər ərzində bir çox müxtəlif janrlı obrazlar yaratmışdır. Onun Humay (S.Rəhman, "Əliqulu evlənir"), Afət (M.Şamxalov "Qaynana"), Qrafinya (U.Şekspir, "Axırı xeyir olsun"), Dilarə (Anar, "Şəhərin yay günləri"), Dilbər xanım (N.Vəzirov, "Hacı Qəmbər"), Oqudalova (A.Ostrovski "Cehizsiz qız"), Smeraldina (K.Qoldoni, "İki ağanın bir nökəri"), Böyükxanım (C.Cabbarlı, "Aydın"), Xala (Ü.Hacıbəyov, "Arşın mal alan"), Nazik (S.Rəhman, "Ulduz") və s. rolları tamaşaçı rəğbətini qazanmışdır. E.İsmayılova teatr sahəsindəki fəaliyyəti ilə yanaşı "Ömürdən uzun gecə", "Əkizlərin nağılı", “Bəsdir, ağlama!”, “Bir anın həqiqəti” kimi filmlərdə də yaddaqalan obrazlar yaratmışdır.

E.İsmayılovanın yaradıcılığı dövlət tərəfindən yüksək qiymətləndirilmişdir.  Azərbaycan SSR Ali Sovetinin Fəxri fərmanı (1978), Əməkdar artist fəxri adı (2000-ci il), Azərbaycan Respublikası Prezidentinin mükafatı (2006, 2007, 2008-ci illərdə), 2007-ci ildə isə “Xalq Artisti” fəxri adına layiq görülmüşdür.

Elmira İsmayılova uzun illərdir Azərbaycan mədəniyyətinin inkişafına misilsiz töhfələr vermiş sənət fədaisidir. O, həm teatr səhnəsində, həm də kino ekranında yaratdığı obrazlarla tamaşaçıların qəlbində silinməz iz buraxmış, yüksək sənətkarlıq nümunələri göstərmişdir. Aktrisanın ifasında həyat tapan obrazlar onun dərin psixoloji yanaşması, daxili hiss və duyğularla zəngin təqdimat tərzi ilə fərqlənir.

Elmira İsmayılovanın sənət yolu peşəkarlıq, zəhmət və vətənpərvərliklə doludur. O, sənətdəki mövqeyini yalnız istedadla deyil, eyni zamanda milli-mənəvi dəyərlərə sadiqliyi ilə qazanmışdır.

Qərbi Azərbaycan İcmasının üzvü kimi, o, tarixi yaddaşın qorunmasında və milli kimliyin yaşadılmasında da fəal mövqe nümayiş etdirir.

Elmira xanım İsmayılovanı doğum günü münasibətilə təbrik edir, ona möhkəm cansağlığı, yeni yaradıcılıq uğurları və sənət ömrünün davamlı olmasını arzu edirik.

Tahirə AĞAMİRZƏ