• Azərbaycan Televiziyasında və “Mədəniyyət” kanalında VIII Muğam Televiziya Müsabiqəsi başlayıb. Müsabiqə Heydər Əliyev Fondunun, Mədəniyyət Nazirliyinin və Azərbaycan Televiziyasının təşkilatçılığı ilə həyata keçirilir.

Ulu Öndər Heydər Əliyevin anadan olmasının 99-cu ildönümü günündə – mayın 10-da Beynəlxalq Muğam Mərkəzində müsabiqənin açılışı olub. Ümummilli Liderin xatirəsi ehtiramla yad edilib, onun Azərbaycan mədəniyyətinə hər zaman yüksək qiymət verdiyi, mədəniyyət xadimlərinə, sənət adamlarına diqqət ayırdığı bildirilib.

Sonra müsabiqənin tarixində iz qoymuş mərhum sənətkar, Xalq artisti Əlibaba Məmmədov yad edilib, onun Ulu Öndərlə görüşündən fraqment yayınlanıb.

Açılış mərasimində Xalq artisti Mənsum İbrahimovun və Əməkdar artist Babək Niftəliyevun ifaları dinlənilib. Şəhid Xudayar Yusifzadənin “Vətən yaxşıdır” mahnısını oxuduğu video nümayiş etdirilib. Şəhidlərin xairəsi yad edilib. Mərasimdə iştirak edən Vətən müharibəsi iştirakçıları ayaq üsta alqışlanıblar.

Məlumat verilib ki, müsabiqənin münsifləri respublikanın hər yerində olub, 300-dən çox iddiaçı arasından final mərhələsinə 18 nəfər böyük, 10 nəfər uşaq ifaçı seçiblər.  Onlar aşağıdakılardır:

Böyük yaşlılar: Fuad Əzizzadə (Bərdə), Tahir Şəfiyev (Bərdə), Səbinə Abbasova (Kəlbəcər), İsmayıl Talıbxanzadə (Şamaxı), Aydan Süleymanzadə (Laçın), Vüqar Əbilov (Bakı), Nərgiz Cabbarova (Ağcabədi), Məftun Səfərli (Sabirabad), Günel Allahverdiyeva (Biləsuvar), Vüsal Qasımov (İmişli), Ülkər Abdullayeva (Tərtər), Aynur Həsənxanova (Zəngilan), Sabir Hüseynov (Yevlax), Günay Mütəllimova (Quba), Əmrah Məmmədov (Bərdə), Rəvanə Vəliyeva (Ağdam), Pedram Rəcbər (Təbriz, İran), Daşqın Kürçaylı (Ağsu).

Azyaşlılar: Ədilə Əliyeva (Bakı), Sabir Ağayev (Füzuli), İsfəndiyar Dadaşov (Qobustan), Fatimə Kərimova (Laçın), Məhəmməd Əlizadə (Bərdə), Lətif Lətifli (Ağcabədi), Həzrət Əzizli (Biləsuvar), Abbas Mənsimov (Goranboy), Səlim Əliyev (Gəncə), Aydan Həmzəyeva (Omsk, Rusiya Federasiyası).

Müsabiqənin ilk günündə onların bir hissəsinin ifaları dinlənilib.

Münsiflər heyətinə Xalq artistləri Arif Babayev, Səkinə İsmayılova, Mələkxanım Əyyubova, Sərdar Fərəcov, Mənsum İbrahimov, Nəzakət Teymurova, Teyyub Aslanov, Əməkdar artist Fərqanə Qasımova və Əməkdar mədəniyyət işçisi İlqar Fəhmi daxildirlər.

Münsiflər heyəti müsabiqə iştirakçılarının çıxışlarını qiymətləndirib, onlara uğurlar arzulayıblar.

Müsabiqə həftədə 2 dəfə – çərşənbə axşamı və cümə axşamı AzTV-də və Mədəniyyət TV-də canlı yayımlanacaq.