13.12.2022, 17:20 272
- Şuşa Rayon İcra Hakimiyyətinin təşkilatçılığı ilə Şuşanın 270 illik yubileyi qeyd edilib. Azərbaycanın elm, təhsil, mədəniyyət, ictimai-siyasi fikir tarixinə görkəmli töhfələr vermiş, təbiəti, tarixi abidələri ilə məşhur xan şəhərinin yubiley tədbiri 192 yaşlı Şuşa şəhər 1 nömrəli tam orta məktəbdə keçirilib.
Tədbir Dövlət Himnimizin səsləndirilməsi və Azərbaycan Respublikasının ərazi bütövlüyü uğrunda şəhidlik zirvəsinə ucalan qəhrəman vətən oğullarının xatirəsinin 1 dəqiqəlik sükutla yad edilməsi ilə başlayıb. Daha sonra “Şuşa - 270” filmi tamaşaçılara təqdim olunub. Tədbiri giriş sözü ilə Şuşa Rayon İcra Hakimiyyəti Başçısının müavini Vüsalə Fətəliyeva açaraq Şuşanın təhsil, maarifçilik və mədəniyyət ənənələri haqqında qonaqlara ətraflı məlumat verib. Tədbirdə Elm və Təhsil Naziri Emin Əmrullayev, Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev, kimyaçı alim, AMEA-nın akademiki Vaqif Fərzəliyev, Əməkdar müəllim, YAP Şuşa rayon təşkilatının sədri Təvəkkül Əliyev, Mətbuat şurasının sədri Rəşad Məcid, millət vəkili Elman Məmmədov, Xüsusi Təyinatlı Qüvvələrin polkovniki Səbuhi Allahverdiyev, Xalq artisti Firəngiz Mütəllimova, İqtisadiyyat Universitetinin məzunu Ayaz Qurbanlı və başqaları çıxış edib.
Şuşa RİH-nin başçısı Bayram Səfərov Şuşanın 270 illik yubileyini böyük sevinclə qeyd etdiyimizi və bu şərəfi bizə bəxş edən Müzəffər Ali Baş Komandan cənab İlham Əliyevə, Rəşadətli oğullarımıza dərin minnətdarlığını bildirib. İcra başçısı Şuşada həyata keçirilən böyük bərpa və quruculuq işləri, işğaldan azad edilmiş ərazilərə qayıdışa dair I Dövlət Proqramının icrası haqqında qonaqlara ətraflı məlumat da verib.
Tədbirin sonunda yubiley iştirakçıları adından Prezident cənab İlham Əliyevə müraciət ünvanlanıb. Tədbir bədii hissə ilə başa çatıb.
Hazırladı: Mina RƏŞİD
