09.12.2024, 15:54 368
- Əslən Kəlbəcər rayonundan olan tanınmış yazar, şair-jurnalist Namiq Dəlidağlı “Çingiz Aytmatov qızıl qələm” medalı ilə təltif edilib. Azərbaycan Yazıçılar Birliyinin və Azərbaycan Jurnalistlər Birliyinin üzvü Namiq Dəlidağlı bu ali mükafata Qırğız Respublikası Elm-Təhsil, Peşə Akademiyası tərəfindən layiq görülüb.
"Vətən səsi" xəbər verir ki, kəlbəcərli yazar Namiq Dəlidağlı türkdilli dövlətlər arasında ədəbi əlaqələrin genişləndirilməsi və media sahəsində əməkdaşlığın inkişafı və təbliğindəki fəaliyyətinə görə bu medala sahib olub. Onun ədəbi nümunələri və məqalələri mütəmadi olaraq qardaş ölkələrin mətbuatında dərc edilir.
Namiq Dəlidağlının qurucusu olduğu “Manevr.az” və “Dalidag.az” saytlarının səhifələrində türkdilli ölkələrin yaradıcı adamlarına geniş yer verilir. Prezident təqaüdçüsü olan yazar indiyədək bir sıra təltif və mükafatlarla fərqləndirilib. Bunların arasında "Qızıl qələm" və digər ədəbi, media mükafatlarına, habelə Qazaxıstanın "Əhməd Yasəvi" mükafatı da var.
Namiq Dəlidağlının indiyədək “Ağ gecənin nağılı”, “Otel otağından reportaj”, “Əllidə ələnənlər” adlı şeirlər kitabı işıq üzü görüb. O, həm də 4 publisistik kitabın həmmüəllifidir. Bir çox şeirləri Azərbaycanda və xaricdə nəşr olunan ədəbi toplularda çap edilib. Şeirlərinə mahnılar bəstələnib.
"Dəlidağ" Ədəbi Birliyinin və Azərbaycan Jurnalistlər Birliyi Kəlbəcər bölməsinin sədri olan şair-jurnalist həm də Türkiyədə fəaliyyət göstərən "Kapsamhaber" saytının köşə yazarıdır.
Elxan SALAHOV
