19.01.2023, 11:20 454
- Kəlbəcər rayon İcra Hakimiyyətində “20 yanvar həqiqətlərinin dünya ictimaiyyətinə çatdırılmasında Ümumilli Lider Heydər Əliyevin rolu” mövzusunda dəyirmi masa keçirilib. Tədbirdə Kəlbəcər RİH-nin başçısı Azər Qocayev, YAP Kəlbəcər rayon Təşkilatının sədri Həbib Misirov, rayonun hüquq-mühafizə orqanlarının rəhbərləri, professorlar Ələmdar Əlbəndov və Elman Mövsümov, Vətən Müharibəsi Qəhrəmanı polkovnik-leytenant Anar Əliyevin atası Vaqif Əliyev, 20 yanvar şəhidi Cabbarov Firuz Vəli oğlunun qardaşı Qeysər Cabbarov iştirak edib.
Əvvəlcə Ümumilli Lider Heydər Əliyevin əziz xatirəsi bir dəqiqəlik sükutla yad edilib. Tədbirdə çıxış edən natiqlər Ümumilli Lider Heydər Əliyevin Azərbaycana misilsiz xidmətlərindən söz açıb, 20 yanvar həqiqətlərinin dünya ictimaiyyətinə çatdırılmasında bu dahi şəxsiyyətin rolunu xüsusi vurğulayıblar. Qeyd edilib ki, bu gün dövlətimizin başçısı, Müzəffər Ali Baş Komandan cənab İlham Əliyev və Birinci vitse-prezident Mehriban xanım Əliyeva tərəfindən faciə qurbanlarının yaxınlarına və faciədən əziyyət çəkmiş insanlara xüsusi dövlət qayğısı göstərilir. Eyni zamanda qeyd edilib ki, 20 yanvar faciəsi xalqımızın yaddaşına qəhrəmanlıq dastanı kimi yazılıb. 20 yanvar qurbanlarının əziz xatirəsi daima hər birimizin qəlbində yaşayacaq, onların cəsurluğu yetişən gənc nəsilin milli vətənpərvərlik ruhunda böyüməsinə bir nümunədir.
Mina RƏŞİD
