01.08.2023, 10:53 263
- Azərbaycanın Zəfər yürüşü başlananda Şirzad müddətdən artıq hərbi qulluqçu idi. Düşməndən qisas almaq, torpaqlarımızı azad etmək igid Vətən övladı kimi onun da ən böyük arzusuna çevrilmişdi. Doğmaları deyir ki, Şirzad çox vətənpərvər idi, O Murovdağ istiqmətində mərdliklə savaşdı...
Bu gün qəhrəman şəhidimizin doğum günüdür. Mirzəyev Şirzad Mirzə oğlu 1996-cı il avqust ayının 1-də Göygöl rayonunun Qarabulaq kəndində anadan olub. 2003-cü ildə Qarabulaq kənd tam orta məktəbinin 1-ci sinfinə qəbul edilib. 2014-cü ildə həmin məktəbin 11-ci sinfini bitirib. 2014-cü ilin oktyabr ayından 2016-cı ilin aprel ayınadək “N” saylı hərbi hissədə həqiqi hərbi xidmət keçib. 2020-ci ildə “N” saylı hərbi hissədə müddətdən artıq xidmət edən hərbi qulluqçu kimi yenidən Vətənə xidmətə başlamışdı.
2020-ci il sentyabrın 27-də başlanan 44 günlük Vətən müharibəsində Şirzad Mirzəyev mərdliklə döyüşlərə qatılıb. O, 2020-ci il oktyabrın 2-də Kəlbəcər istiqamətində gedən qanlı döyüşlərdə qəhrəmancasına şəhadətə ucalıb. Şəhidimiz böyük izdiham və el məhəbbəti ilə son mənzilə doğma Göygöl rayonunda torpağa tapşırılıb.
Ölkə Prezidenti İlham Əliyevin Sərəncamları ilə Şirzad Mirzəyev ölümündən sonra “Vətən uğrunda”, “İgidliyə görə” və “Kəlbəcərin azad olunmasına görə” medalları ilə təltif edilib.
Şəhidimiz ailəli idi, onun bir qız övladı Vətənə əmanətdir.
Cənnətdəki doğum günün mübarək, ruhun şad olsun, Şəhidim!
Mina RƏŞİD
