• Mığrı (Meğri) Rayon İcması və kənd icmalarının təşkilatçılığı ilə “O Gün Ayrıldıq… Bu Gün Xatırlayırıq və Qayıdacağıq – 1988-ci ilin Soyuq Payızının Xatirəsi” adlı anım tədbiri keçirilib.

İcmadan verilən məlumata görə, tədbir 1988-ci ilin soyuq payız günlərində Mığrı rayonunun Lehvaz, Lök, Maralzəmi, Aldərə, Mığrı şəhəri və Əkərək kəndlərinin dinc əhalisinin erməni silahlı dəstələrinin təzyiqi və zorakılığı nəticəsində öz dədə-baba yurdlarından deportasiya edilməsinin 37-ci ildönümünə həsr olunub. Həmin günlərdə minlərlə sakin yurd-yuvasını itirərək bir neçə ay ərzində Nüvədi kəndində sığınmağa məcbur olmuşdu. Üzərindən 37 il keçsə də, o faciənin ağrısı və yaşanan iztirablar yaddaşlardan silinməyib.

Anım mərasimində Qərbi Azərbaycan İcmasının İdarə Heyətinin sədri, millət vəkili Əziz Ələkbərli, Mığrı Rayon İcmasının sədri, akademik Fikrət Əliyev, Qərbi Azərbaycan İcmasının Aparat rəhbəri Qalib Qasımov, Yeni Azərbaycan Partiyasının Nəzarət Təftiş Komissiyasının üzvü Musa Musayev, Qərbi Azərbaycan İcması İctimaiyyətlə əlaqələr və Qərbi Azərbaycan Televiziyası şöbəsinin rəhbəri, əməkdar mədəniyyət işçisi Telli Pənahqızı, eləcə də kənd ağsaqqalları, ziyalılar, deportasiya şahidləri və Mığrı elinin müxtəlif bölgələrindən olan sakinlər iştirak ediblər.

Tədbirdə çıxış edən Qərbi Azərbaycan İcması İdarə Heyətinin sədri, millət vəkili Əziz Ələkbərli 1988-ci ilin Mığrı deportasiyasının Azərbaycan xalqına qarşı həyata keçirilmiş sistemli etnik təmizləmə siyasətinin bir hissəsi olduğunu qeyd edib. O, bildirib ki, Qərbi Azərbaycan İcması bu tarixi həqiqətlərin dünyaya çatdırılması və deportasiya şahidlərinin xatirələrinin qorunması istiqamətində ardıcıl fəaliyyət göstərir. Millət vəkili əlavə edib ki, beynəlxalq hüquq çərçivəsində və sülh yolu ilə Qərbi Azərbaycana qayıdış prosesi artıq tarixi reallığa çevrilməkdədir.

Fikrət Əliyev çıxışında Mığrı kəndlərinin yaşadığı ağır sınaqlardan danışaraq həmin hadisələrin yalnız faciə deyil, həm də Mığrı elinin sınmayan iradəsinin göstəricisi olduğunu bildirib. O vurğulayıb ki, icmanın yaddaşını diri tutması Qayıdış yolunda mühüm mənəvi dayaqdır.

Akademik bildirib ki, Azərbaycanın əldə etdiyi böyük Zəfərdən sonra Qarabağa Qayıdışın reallığa çevrilməsi, ölkə başçısı İlham Əliyevin uzaqgörən siyasəti sayəsində Qərbi Azərbaycana da sülh və beynəlxalq hüquq çərçivəsində qayıdışa inamı daha da möhkəmləndirib.

O, 1988-ci ilin acı hadisələrini xatırlayaraq Ulu Öndər Heydər Əliyevlə bağlı xatirələrini bölüşüb. Vurğulayıb ki, hazırda ərsəyə gələn Zəngəzur dəhlizinin 19 kilometrlik hissəsinin əsası o dövrdə məhz Heydər Əliyev tərəfindən qoyulub.

Yeni Azərbaycan Partiyası Nəzarət-Təftiş Komissiyasının üzvü Musa Musayev Mığrı deportasiyasının bütün Azərbaycan xalqının taleyində açdığı dərin yaralardan danışaraq tarixi ədalətin bərpasının milli məsələ olduğunu qeyd edib.

Daha sonra kənd icmalarının nümayəndələri xatirələrini bölüşüb, fikir mübadiləsi aparıblar.

Tədbir çərçivəsində deportasiyadan öncə Mığrı rayonunun və kəndlərin həyatını əks etdirən fotoxronika nümayiş etdirilib. Kəndlərin təbiət mənzərələri və insanların yaşayış tərzini əks etdirən görüntülər tədbir iştirakçılarını keçmişə apararaq duyğulandırıb, yaddaşlardakı izləri yenidən canlandırıb.

İştirakçılar Mığrı elinin birliyinin və tarixi ədalət uğrunda mübarizə əzminin daha da gücləndiyini, çox yaxın zamanda evlərindən didərgin salınmış qərbi azərbaycanlıların öz doğma yurdlarına — Mığrıya, Lehvaza, Lökə, Maralzəmiyə, Aldərəyə, Əkərəyə və digər dədə-baba torpaqlarına qayıdacaqlarına əmin olduqlarını bildiriblər. (AZƏRTAC)