18.09.2023, 09:52 185
- Şanlı Vətən Müharibəsində qəhrəmancasına şahadətə ucalan əsgər Səfər Elmar oğlu Həsənov 2001-ci il sentyabrın 18-də Neftçala rayonunun Xıllı qəsəbəsində dünyaya gəlib. Ailəsi ilə birgə atasının işi ilə əlaqədar bir müddət Bakı şəhərinin Buzovna qəsəbəsinə köçüb burada yaşayıblar. Səfər Buzovnadakı 26 nömrəli tam orta məktəbdə oxuyub, sonra iki il rəssamlıq üzrə təhsilini davam etdirib. Binə qəsəbəsində yerləşən texniki peşə məktəbində dekorativ rəssamlıq sənətinə yiyələnib. Həqiqi hərbi xidmətini başa vurduqdan sonra qida sektorunda çalışmağa başlayıb.
Səfər Həsənov 2019-cu il oktyabrın 1-də həqiqi hərbi xidmətə çağırılıb və Goranboy rayonu ərazisində xidmət edib. Daha sonra hərbi xidmətini Tərtər rayonunda N saylı hərbi hissədə davam etdirən Səfərin atıcılıq bacarığı qiymətləndirilib və Mingəçevir şəhərində xüsusi snayper təlimlərinə cəlb olunub və sərrast nişançı kimi fərqlənib.
2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan İkinci Qarabağ müharibəsi zamanı Səfər Həsənov ordumuzun mərd əsgəri kimi döyüşlərə qatılıb.
Noyabrın 11-nə qədər düşmənlə savaşan gənc əsgər döyüşlərdə şücaətlər göstərib. Noyabrın 1-də Suqovuşan istiqamətində düşmən tərəfindən atılan artilleriya mərmisinin partlaması nəticəsində aldığı qəlpə yarasından şəhid olub. Şəhidimiz böyük izdiham və ehtiramla Buzovna şəhəri Şəhidlər Xiyabanında torpağa tapşırılıb.
Ölkə başçısı, Ali Baş Komandan İlham Əliyevin sərəncamlarına əsasən Səfər Elmar oğlu Həsənov ölümündən sonra "Vətən uğrunda", “Cəsur döyüşçü” və “Suqovuşanın azad olunmasına görə” medalları ilə təltif edilib.
Bu gün 19 yaşlı qəhrəman Şəhidimizin doğum günüdür.
Cənnətdəki doğum günün mübarək, məzarın nurla dolsun, Səfər balamız!
Mina RƏŞİD
