• Bu günlərdə “Heydər Əliyev və milli mətbuat” adlı yeni kitab işıq üzü görüb. AMEA-nın Nizami Gəncəvi adına Ədəbiyyat İnstitunun “Mətbuat tarixi və publisistika” şöbəsinin hazırladığı yeni nəşr Ümummilli Lider Heydər Əliyevin 100 illiyinə həsr olunub.

Elmi kitab AMEA-nın prezidenti, akademik İsa Həbibbəylinin “Heydər Əliyevin dövlətçilik siyasətində mətbuat” başlıqlı ön sözlə açılır, Heydər Əliyev şəxsiyyətinin üstün keyfiyyətlərinə və onun uzaqgörən siyasəti sayəsində əldə olunan inkişafa nəzər salınır. Akademik görkəmli dövlət xadimi olan Heydər Əliyevin milli mətbuatın inkişafına verdiyi böyük dəyəri və qayğını, milli mətbuatın inkişafında rolunu yüksək dəyərləndirir, eyni zamanda Nizami Gəncəvi adına Ədəbiyyat İnstitunun “Mətbuat tarixi və publisistika” şöbəsinin hazırladığı məqalələr toplusunu “Heydər Əliyev ili”nə elmi töhfə adlandırır. 

Kitabda “Mətbuat tarixi və publisistika” şöbəsinin əməkdaşları Vüqar Əhməd, Elçin Mehrəliyev, Gülbəniz Babayeva və Gülnar Səmanın (Qasımlı) Ulu Öndər Heydər Əliyevin çoxcəhətli fəaliyyətindən, onun Azərbaycan xalqı qarşısındakı əvəzsiz xidmətlərindən bəhs edən elmi məqalələri toplanıb. Məqalələrdə dünya şöhrətli siyasətçi və dövlət xadimi, Ümummilli lider Heydər Əliyevin mətbuatla dövlətçilik əlaqələrinin qurulmasındakı tarixi xidmətlərindən, Heydər Əliyev siyasi kursunun ölkəyə qazandırdığı nailiyyətlərdən bəhs olunur. Ulu öndərin mətbuatın cəmiyyətin inkişafındakı əvəzsiz gücündən məharətlə istifadə etməsi, fəaliyyətinin Azərbaycançılıq ideyasının təbliğinə yönəldilməsində cəsarətli mövqe tutması maraqlı faktlarla açıqlanır. Heydər Əliyevin uzaqgörən siyasəti, Azərbaycan xalqı və milli mətbuatımızın qarşısındakı əvəzsiz xidmətləri, gərgin ictimai-siyasi fəaliyyəti haqqında zəngin təsəvvür yaradılır. Məqalələrdə Heydər Əliyevin milli mətbuatımızın müstəqil dövlətçiliyimizlə bağlılığı, mətbuatın dövlət idarəetmə sistemindəki yeri və rolu haqqında dəyərli fikirlərinin şərhi verilir.

Kitabın elmi redaktoru filologiya elmləri doktoru, professor Vüqar Əhməd, məsul redaktorları filologiya üzrə fəlsəfə doktorları Gülbəniz Babayeva və Töhfə Talıbovadır. Kitab BDU-nun professoru Cahangir Məmmədlinin və əməkdar jurnalist Namiq Əhmədovun rəyi ilə “Elm və təhsil” nəşriyyatında çap olunub.

Hazırladı: Mina RƏŞİD