30.07.2023, 11:35 220
- Zəngəzur mahalı Qubadlı rayonunun Həmzəli kənd inzibati ərazi dairəsində olan Əfəndilər kəndi Həkəri çayı sahilində, İncə düzündə yerləşir. Kəndin keçmiş adı Kürd Əfəndilər olmuşdur. Yerli əhalinin verdiyi məlumata görə, vaxtilə Türkiyədən gəlmiş Məmməd Əfəndi adlı bir nəfər bu kəndin bünövrəsini qoyduğuna görə onun adı ilə adlanmışdır.
28 aprel 1920-ci ildə Azərbaycan Xalq Cümhuriyyətinin süquta uğramasından və bolşeviklərin işğalına məruz qalmasından sonra, 1923-cü il iyul ayında Yelizavetpol quberniyasının Cavanşir və Zəngəzur qəzalarının bir hissəsindən Kürdüstan mahalı (sonradan qəza) təsis edilmişdir. Əfəndilər kəndi mahalın bir hissəsi olmuşdur. 1856-cı il "Qafqaz təqvimi"nə görə, Əfəndilər kəndinin əhalisi kürd dilində danışan şiə kürdlərdən ibarət olmuşdur. Kürdüstan qəzası ləğv edildikdən sonra Əfəndilər Qubadlı rayonunun tərkibinə daxil edilmişdir.
Əfəndilər kəndi 1993-cü ilin avqust ayında erməni terorçuları tərəfindən işğal edilmişdi, erməni vandalları işğal dövründə bu kəndi də yerlə bir edərək xarabalığa çeviriblər.
Vətən müharibəsində düşmənə sarsıdıcı zərbə vuran rəşadətli Azərbaycan Ordusu 2020-ci il oktyabr ayının 25-də kəndi işğaldan azad edib.
Tahirə AĞAMİRZƏ
