27.08.2025, 14:00 218
- “Ermənistanda Rusiya Federasiyasının 102-ci hərbi bazasının çıxarılmasına dair hərəkətlənmə var və hesab edirəm ki, bu, dövlətin dəstəyi ilə həyata keçirilir. Baxbayaraq ki, bunu demokratiya çalarları ilə təqdim etməyə çalışırlar”.
Bu fikirləri “Ednews TV”-yə açıqlamasında politoloq İlyas Hüseynov səsləndirib.
Politoloq əlavə edib:
“Məlumdur ki, 2018-ci ildən hakimiyyətdə olan qüvvələr əsas hədəf kimi Rusiyanın hərbi bazasının çıxarılmasını irəli sürüblər və heç vaxt da bundan imtina etmirlər. Xüsusilə Vaşintqon razılaşmalarından sonra belə görünür ki, Rusiya bazasının çıxarılmasının sürətləndirilməsi tapşırığı verilmişdir və icrasına başlanılır”.
Politoloq daha sonra vurğulayıb ki, digər tərəfdən hakimiyyətin növbəti ildə parlament seçkilərində uğur qazanması üçün addımlar atılması da göz qabağındadır: “Məhz daxili elektoratı bu proseslərə yönəltmək məqsədləri də hakimiyyət tərəfindən irəli sürülə bilər. Çünki 102-ci hərbi bazasının Ermənistanda saxlanılmasını istəyən qüvvələr də zaman-zaman baş qaldırır. Bu da xüsusilə media sahəsində özünü göstərir. Eyni zamanda 102-ci bazanın saxlanılmasına dair rusiyameyilli qüvvələrin meydanlara çıxması halı da müşahidə olunur. Məlumdur ki, Nikol Paşinyanın hakimiyyətdən getməsi istiqamətində kilsə və eyni zamanda onu dəstəkləyən qüvvələrin də hakimiyyət əleyhinə çıxışları mövcuddur. Xüsusilə Samvel Karapetyan kimi fiqurun burda kilsənin arxasında dayanması heç də təsadüfi deyil və məlumdur ki, proslər idarə olunmaqdadır”.
“102-ci hərbi bazanın Ermənistanı tərk etməsi Ermənistan üçün tam müstəqillik anlamını verəcək. Bu baza Ermənistan ərazisində qaldıqca Ermənistan nə qədər reveranslar, Qərb istiqamətində hərəkətlər, hətta avrointeqrasiyanı öz konstitusiyasına daşımağa çalışsa da, istənilən halda Kremldən asılı olacaqdır və bu məsələni köklü həll eləmək niyyəti mövcuddur. Lakin bu da hesab edirəm ki, heç də asan olmayacaqdır”,- deyə politoloq fikrini tamamlayıb.
Tahirə AĞAMİRZƏ
