29.11.2025, 21:40 97
- Özbəkistanın Azərbaycanda Mədəniyyət Günlərinin keçirildiyi 70-ci illərdə bu yerlərə gəlmişdim. Hesab edirəm ki, mən xoşbəxt insanam, çünki burada Heydər Əliyev, Tofiq Quliyev, Rəşid Behbudov, Müslüm Maqomayev, Zeynəb Xanlarova kimi görkəmli insanlarla görüşmüşəm.
Bunu müsahibəsində Özbəkistanın Xalq artisti professor Mansur Taşmatov deyib.
“Bu şəhəri tanımıram, axı burada çox illər əvvəl olmuşam. Amma Şuşanı və Ağdamı çox yaxşı xatırlayıram. Orada çoxlu konsertlər vermişdik. Bu regionla məni Molla Pənah Vaqifin yaradıcılığı bağlayır. Onun şeirlərinə yazdığım bir mahnım var. Xüsusilə “Xumar-xumar” misralarının yer aldığı şeiri məni dərindən təsirləndirdi. Onu oxudum və dərhal bir mahnı yarandı. Bu mahnını Özbəkistanda qürur və sevgi ilə ifa edirəm. O, özbək dilinə tərcümə olunub. Çox ümid edirəm ki, burada da səslənəcək”, – deyə Xalq artisti xatirələrini bölüşür.
Mansur Taşmatov Laçının müasir görkəmini qeyd edərək bildirib: “Laçın heyrətamiz gözəlliyi olan bir məkandır”.
“Hocazfilm” yaradıcılıq studiyası haqqında danışan Özbəkistanın Xalq artisti deyib: “Film istehsalına belə yanaşma təqdirəlayiqdir. Kino ucuz biznes deyil, böyük investisiya tələb edir. Görünür ki, Azərbaycanda kino sənayesinin inkişafına çoxlu vəsait qoyulub və böyük maraq var. Təbii ki, bu studiya kimi obyektlər əsl kino istehsalçılarını cəlb edəcək və etməlidir də”. (AZƏRTAC)
