16.06.2025, 19:10 116
- “İRS” Nəşriyyat Evinin kitablarının təqdimat mərasimində iştirak etməkdən çox məmnun oldum. Azərbaycanın gülüstan guşələrini, rayonlarını əks etdirən, xüsusilə də Qarabağdan əsrarəngiz fotolara heyran oldum. İnanıram ki, bu kitablarla daha yaxından tanış olmağa imkanım yaranacaq. Bu fotolar vasitəsilə Azərbaycanın dilbər guşələrini yenidən səyahət etdim. Bu kitablar mənim üçün xüsusi əhəmiyyət kəsb edir. Çünki dəfələrlə Azərbaycanda olub, bir çox rayonları gəzmişəm. İndi də çox istərdim ki, yenidən Azərbaycana gedim, xüsusilə də Şuşaya.
Bu fikirləri açıqlamasında Fransanın moda sahəsində öz məktəbini yaradan Tilman Qrav deyib.
“Azərbaycanın füsunkar təbiətindən, mədəniyyətindən ilhamlanaraq, "Şuşa" kompozisiyasını təqdim etmişəm. Şuşa ilə bağlı xoş xatirələrim var. Qarabağ işğal altında olanda Şuşa ənənələrinin yaşaması üçün xalça ilmələrini, naxışlarını müasir dövrlə uyğunlaşdıraraq, göy, yaşıl və bənövşəyi rənglərdən istifadə edərək baş geyimlərindən ibarət “Şuşa” kolleksiyamı nümayiş etdirdim. Bu gün azad Şuşaya gedərək, orada yeni kolleksiya yaratmaq istərdim”, - deyə T. Qrav ölkəmizlə bağlı xatirələrini bölüşüb.
O, Qarabağ xalçaçılıq məktəbini çox sevdiyini deyib və “Şuşa” kompozisiyasını yeni tərtibatda Şuşada yenidən təqdim etmək istədiyini bildirib. (AZƏRTAC)
