• Bir xalq düşünün, ölkəsini idarə edən şəxsə və onun hakimiyyətinə qarşı qəlbində nifrət böyüdür. Yalnız bu nifrət bıçaq sümüyə dirənəndə özünü göstərir. Necə ki, biz bunun nümunəsini bu gün Suriyada görürük. Əsəd və onun başında dayandığı rejim 61 il ərzində xalqını öz ölkəsində can qorxusu ilə yaşamağa, yurd-yuvasını tərk edib başqa ölkələrdə qaçqın olmağa məcbur edib. Bu gün həmin xalq illərdir yaşadığının qisasısı Əsədin evindən, sərvətindən, atasının məzarından, heykəllərdən alır. Əsəd hakimiyyətinin sonu xalqını nə qədər sevindiribsə də siyasi anlamda qalxan rolunu oynadığı ölkələr üçün heç də xoş xəbər olmayıb. Təbii ki, Rusiya, İran kimi ölkələrin  niyə məyus olduğu aydındır. Lakin bir ölkə də var ki, adı çox hallanmır. İllərdən bəri ölkəmizə qarşı düşmən mövqe tutan Ermənistan.

Bəs nəyə görə həm ölkə daxilində, həm də ölkə xaricində yaşayan ermənilər Əsədin çarxının dönməsinə üzülməlidir. Çox uzağa getməyək, 44 günlük Vətən müharibəsində belə bir xəbər farş oldu. Suriyada təlim görmüş erməni yaraqlıları torpaqlarımıza döyüşmək üçün göndərilib.  Üstəlik faktiki terrorçu olan bu insanlar Suriyada, Liviyada yaşayan sadə, məzlum erməni ailələri kimi təqdim olunurdu. Qısacası Suriya erməni terror təşkilatlarının hərbi batalyonlarının fəallıq göstərdiyi bir coğrafiya idi. Ekspertlər bildirir ki, bu terrorçuların Əsəd rejimi Suriya xüsusi xidmət orqanları ilə sıx əlaqəsi var idi. 90 mindən çox Suriya ermənisinin  Azərbaycanın o vaxtki işğal altında olan ərazilərində məqsədli şəkildə məskunlaşdırılması, bu ərazilərin demokrafik tərkibinin dəyişdirilməsi cəhdi müharibə cinayətinin tərkib hissəsidir. Çünki Bəşər Əsəd rejimi həmişə ermənipərəst mövqe tutub və Azərbaycana qarşı olub. Necə ki, Kəşmir məsələsində də haqlı olan Pakistan deyil, Hindistanı dəstəkləyib.

Ermənistanın baş naziri Nikol Paşinyan da Əsəd hakimiyyəti dövründə bu ölkəylə sıx əlaqədə olub. Paşinyanın iddiasına görə əsirlərin dərinliklərindən gələn və tarixi sınaqlarla möhkəmlənən Ermənistan Suriya dostluğu daha da möhkəmləndirilməliydi. Suriyanın İslam Əməkdaşlıq Təşkilatı çərçivəsində Azərbaycanın maraqlarına qarşı çıxış etməsi Ermənistanla bağlı qətnamələrə mane olmaq cəhdləri də unudulmayıb. Onu da qeyd edək ki, Suriya Yaxın Şərqdə qondarma Erməni soyqırımını tanıyan tək-tük ölkələrdən biridir.

Günel QULİYEVA