• Zaxarovadan Ermənistan–Azərbaycan arasında sülh danışıqlarına razılığın əldə edilməsində və danışıqlar prosesinin gözlənilən məcrada davam etməsində Rusiyanın da payı var.

"Vətən səsi" xəbər verir ki, bu fikri Rusiya Xarici İşlər Nazirliyinin rəsmi nümayəndəsi Mariya Zaxarova dünən keçirdiyi brifinqdə səsləndirib. O, qeyd edib ki, Kremlin Ermənistan-Azərbaycan münasibətlərinin normallaşmasında mövqeyi açıq və ardıcıldır: "Rusiyanın səyləri Cənubi Qafqazda dayanıqlı sülhə nail olunmasına və regionun çiçəklənməsinə istiqamətlənib. Rusiya Prezidenti Vladimir Putinin səyləri nəticəsində 2020 və 2023-cü ildə Qarabağda qan tökülməsini dayandırmağa nail olunub".

Zaxarova onu da bildirib ki, bu ilin avqustunda ABŞ prezidenti Donald Trampın iştirakı ilə Azərbaycan və Ermənistan liderləri arasında əldə edilmiş razılaşmalar, o cümlədən regional kommunkasiyaların açılması məsələsi 2020-ci il noyabrın 10-da imzalanmış üçtərəfli bəyanata əsaslanır. Onun sözlərinə görə, Rusiyanın vasitəçiliyi ilə razılaşdırılmış həmin sənəd Ermənistan-Azərbaycan münasibətlərinin masa üzərindən normallaşmasına yol açıb: "Aydındır ki, üçtərəfli razılaşmalar öz aktuallığını itirməyib. Əksinə, bu razılaşmalar Bakı ilə İrəvan arasında sülh prosesinin yol xəritəsini təşkil edir. Öz tərəfimizdən əvvəlki tək Cənubi Qafqaz ölkələri və onların qonşularının marağında olan qarşılıqlı sərfəli həllə nail olmağa yardım etməyə hazırıq".

Rusiya Xarici İşlər Nazirliyinin rəsmisi Qafqaz regionuna aid ölkələrin hamısını bir araya gətirəcək "3+3" formatından da danışıb. Zaxarova qeyd edib ki, "3+3" regional əməkdaşlıq platforması çərçivəsində növbəti görüş Bakıda və ya İrəvanda keçirilməlidir: "Bu formatda xarici işlər nazirlərinin son görüşü 2024-cü ilin oktyabrında İstanbulda keçirilmişdi. Növbəti görüş Bakıda, ya da İrəvanda keçirilməlidir. Ümid edirik ki, azərbaycanlı və ermənistanlı tərəfdaşlarımız operativ şəkildə bu görüşün növbəliliyini, kimin tədbiri bu il, kimin gələn il keçirəcəyini müəyyən edə biləcəklər. Biz öz tərəfimizdən həmkarlarımızın qərarını dəstəkləyəcəyik. Bu il Azərbaycan və Ermənistan tərəfi dəfələrlə ikitərəfli görüşlər keçiriblər - Abu-Dabidə, Vaşinqtonda və Düşənbədə. Bu cür birbaşa təmaslar məlum məsələnin həllinə də kömək edəcək".

Ekspertlərin fikrincə, Zaxarovanın dünənki açıqlamaları Rusiyanın həm Azərbaycanla Ermənistan arasındakı sülh razılaşmasından, həm də "3+3" regional əməkdaşlıq platformasından böyük gözləntiləri olduğuna işarədir. İndiyədək "3+3" formatı çərçivəsində görüçlərdən yayınmağa çalışan Gürcüstanın son vaxtlar həmin əməkdaşlıq platformasına xüsusi maraq göstərməsi də regionun siyasi arxitekturasında böyük dəyişikliklər olacağını deməyə əsas verir.

Elxan SALAHOV