“Vətən səsi” onlayn qəzetdir, 1990-cı ilin aprelində nəşrə başlamış və 2022-ci il sentyabrın 24-nə qədər kağız daşıyıcıda həftədə bir dəfə çapdan çıxmış, bu müddətdə 1500 nömrəsi işıq üzü görümuş eyniadlı qəzetin hüquqi varisidir. Kağız daşıyıcıda ölkəmizin ilk müstəqil mətbu orqanlarından biri kimi 30 ildən artıq nəşr olunan qəzet qaçqınlar və məcburi köçkünlərlə iş sahəsində dövlət siyasətinin işıqlandırılmasında, tarixi torpalqarımız olan Qarabağın, Şərqi Zəngəzurun, Qərbi Azərbaycanın məruz qaldığı faciələr, həmin ərazilərdəki dogma yurdundan didərgin düşən soydaşlarımızın həyatı barədə həqiqətlərin geniş yayılmasında əhəmiyyətli rol oynayıb, geniş maarifçiliklə, milli mənəvi dəyərlərimizin təbliği ilə məşğul olub, milli mətbuatımızın inkişafına töhfələr verib. Hazırda onlayn rejimdə fəaliyyət göstərən qəzetin yaradıcılıq istiqaməti, yenə tematik olaraq, qaçqın və məcburi köçkünlə bağlı mövzulara fokuslanıb. İşğaldan azad edilmiş ərazilərdə aparılan bərpa-quruculuq işlərinin, Böyük Qayıdışa hazırlıq və onun uğurla həyata keçirilməsi proseslərinin, Qərbi Azərbaycanla bağlı tarixi həqiqətlərin işıqlandırılması, mədəni-mənəvi irsimizin qorunması və zənginləşdirilməsi redaksiyanın qarşısında mühüm vəzifə kimi qoyulub. Qəzetin baş redaktoru Əməkdar jurnalist Elşən Əliyev 1961-ci ildə anadan olub, Azərbaycan Dövlət Universitetinin (indiki Bakı Dövlət Universitetinin) Jurnalistika fakültəsinin məzunudur. "Xalq", "Azərbaycan", "Respublika", "Panorama", "Bizim əsr", "Azərbaycan işıqları" qəzetlərində, "Azərbaycanın vergi jurnalı"nda işləyib. 2018-ci ildən "Vətən səsi"nin baş redaktorudur.

“Öncə Vətəndir!” - qəzet yarandığı gündən öz missiyasını bu şüarla ifadə edib. Bu şüarda xalıqmızın yenilməz və qalib vətənpərvərlik ruhu vardır! Missiyamız Azərbaycan həqiqətlərinə, mülli müstəqil dövlətçiliyimizə, xalqımızın arzu və istəklərinə, işğaldan azad edilmiş torpaqlarımızın dirçəldilməsinə, məcburi köçkün soydaşlarımızın dogma yurda könüllü, təhlükəsiz, ləyaqətli qayıdışına, həmçinin yeni medianın inkişafına xidmət etməkdir.