31.01.2024, 09:38 339
- Yanvar ayı da ermənilər üçün qalmaqalla yekunlaşır. "Hraparak" bu ilin ilk ayının son günündə yayıb ki, erməni parlamentinin bəzi üzvləri sədr Alen Simonyanın rəhbərliyi altında bu il də mövcud qanunları ayaqlar altına atıblar. Parlamentin korrupsiyaya qarşı mübarizə komissiyasının xəbərdarlığına isə məhəl qoyulmur. Əlavə olunub ki, deputatların köməkçiləri, işçi heyətin referentləri öz vəzifələri ilə paralel olaraq başqa vəzifələrdə işləyə bilməzlər. Amma bu qanuna əməl olunmur. Belə ki, həm deputatların çoxu, həm də onların köməkçiləri, referentləri başqa yerdə də işləyirlər.
Parlamentin korrupsiyaya qarşı mübarizə komissiyasının yanvarın 24-dəki iclasında sözügedən məsələyə kəskin münasibət bildirilsə də, bunun işin keyfiyyətinə və sürətinə maneə olduğunu vurğulasa da heç bir tədbir görülməyib. Məqalənin müəllifi Lusine Şahverdiyan bütün bunların hakimiyyətin səriştəsizliyindən və tərəfkeşliyindən baş alıb getdiyini yazaraq sonda belə bir qənaətə gəlib ki, parlamentdə qanunlar pozulursa, başqa sahələrdən düzgün iş tələb etmək yalnız feodal düşüncə ilə mümkündür. Ermənistan hakimiyyəti isə üzdə demokratiyadan danışsa da əməlləri bunu təkzib edir.
N.Qaramanlı
