21.06.2024, 22:30
AZ EN
20.07.2023, 17:48 375

Ulduz Qasımın yeni “Badamgözlü” romanı işıq üzü görüb

YARADICILIQ
  • Əslən Cəbrayıl rayonundan olan yazıçı Ulduz Qasımın yeni “Badamgözlü” romanı çapdan çıxıb. Bu roman bir sədaqət və ümid hekayəsidir. Bir çox romanlardan fərqli olaraq, təkcə qadının sədaqəti üzərində deyil, həm də kişinin sədaqəti üzərində qurulan  sevgi hekayəsidir. Yazıçı Ulduz Qasım sadəcə öz mesajını çatdırmaq üçün qəhrəman və onun  konfliktindən bir növ vasitə kimi istifadə edib. Müəllif öz qəhrəmanı ilə güclü empati qurur və ya öz dünyasını, arzularını öz qəhrəmanına tranformasiya edir. Qəhrəmanımızın taleyi ilə yanaşı, biz dövrün dəyişdiyini, dəyərlərin, baxışların, yanaşmaların dəyişdiyini, yeni bir həyat tərzinin, yeni həyat həqiqətlərinin meydana gəldiyini görürük.

Qeyd edək ki, ilk şerini 7 yaşında yazan Ulduz Qasım 1976-cı ildə Cəbrayıl rayonunun Mehdili kənd orta məktəbini qızıl medalla bitirib. Azərbaycan Dövlət Universitetinin jurnalistika fakültəsini bitirən Ulduz xanım orta məktəb illərində və tələbəlik illərində rayon, respublika mətbuat orqanlarında, radio dalğalarında şeirləri, məqalələri, oçerkləri, hekayələri ilə ardıcıl çıxış edib. “Mən aşiqəm Qarabağda”, “Tələbə gündəliyi”, “Qürbət Zöhrəsi”, “Xocalı şikəstəsi”, “Açılmayan sirrlər”, “Solmayan nərgiz”, “Ağ göyərçinlər”, “Qarabağda qiyamət”, “Qaçaq Aslan”, “Maral” kimi kitabların müəllifidir. “Qürbət Zöhrəsi”, “Xocalı şikəstəsi”və  “Ağ göyərçinlər” romanları türk dilinə və əsərləri müxtəlif dillərə tərcümə olunub. “Xocalı şikəstəsi” (“Xocalı fəryadı”) 2019-cu ildə Türkiyə Mədəniyyət və Turizm nazirliyi tərəfindən ilin  yaxşı əsəri seçilib.

Onun “Solmayan nərgiz”, “Xocalı şikəstəsi”, “Qarabağda qiyamət”, “Ağ göyərçinlər” kimi maraqlı romanları erməni vandalizminin iç üzünü həyati reallqlarla aça bilən əsərlərdir. Onun silsilə romanları sanki bir-bbbirinin davamı olaraq,  işğal dövrünün bədii tarizxi kimi də qavranıla bilər. İnanırıq ki, istedadlı yazıçının  “Badamgözlü” romanı da oxucular tərəfindən sevilərək oxunacaq.

Ulduz xanıma yaradıcılığında böyük uğurlar arzulayırıq.

Tahirə AĞAMİRZƏ

Oxşar xəbərlər