• Azərbaycanla ABŞ arasında Strateji Tərəfdaşlıq haqqında Xartiya iki ölkənin münasibətlərini klassik enerji əməkdaşlığı çərçivəsindən çıxararaq daha geniş strateji gündəliyə çevirən, siyasi-hüquqi baza və institusional icra mexanizmləri üzərində qurulmuş çərçivə deklarasiyadır. Mətndə suverenlik, müstəqillik, ərazi bütövlüyü və sərhədlərin toxunulmazlığına birbaşa istinad edilməsi tərəfdaşlığın prinsipial dayaqlarını möhkəmləndirir. Orta Dəhliz və multimodal bağlantılar, enerji və data əlaqələndirilməsi, ticarət-tranzitin asanlaşdırılması kimi prioritetlər isə Azərbaycanın regional qovşaq rolunu rəsmiləşdirir. Eyni zamanda, süni intellekt və rəqəmsal infrastruktur, tədqiqat və inkişaf alətləri, innovasiya körpüləri və özəl sektorun cəlb edilməsi kimi bəndlər Azərbaycanın texnoloji və investisiya gündəliyini ABŞ-la əməkdaşlıq müstəvisində institusionallaşdırmaq niyyətini göstərir.

Bu sözləri açıqlamasında Milli Məclisin deputatı Azər Kərimli söyləyib.

O bildirib ki, sənədin böyük uğur kimi qiymətləndirilməsinin əsas səbəbi onun diplomatik nəticəni təkcə bəyanatla məhdudlaşdırmaması, konkret icra arxitekturası yaratmasıdır. İşçi Qrupları üç ay ərzində layihə siyahısı və yol xəritələrinin razılaşdırılması, ildə ən azı bir dəfə müntəzəm görüşlər kimi mexanizmlər tərəfdaşlığın davamlılığını təmin edən çərçivə yaradır. Təhlükəsizlik bölməsində antiterror, kibertəhlükəsizlik və kritik infrastrukturun mühafizəsi, eləcə də humanitar minatəmizləmədə maliyyə və texnologiya ötürülməsi kimi praktik və ölçülə bilən istiqamətlərin yer alması sənədin real fayda potensialını artırır. Azərbaycan bu Xartiya ilə özünü regionda enerji, logistika, rəqəmsal bağlantı və təhlükəsizlik üzrə etibarlı tərəfdaş kimi daha yüksək səviyyədə mövqeləndirir və böyük güclə münasibətlərdə strateji gündəliyi daha da genişləndirən model qurur. Bu uğur Prezident İlham Əliyevin ardıcıl və praqmatik xarici siyasət xəttinin məntiqi davamıdır.

“Azərbaycanı regionda etibarlı tərəfdaş, proqnozlaşdırılan və məsuliyyətli aktor kimi möhkəmləndirən diplomatiya məhz bu cür institusional sənədlərlə konkret nəticəyə çevrilir. Prezident İlham Əliyevin balanslı, çoxşaxəli əməkdaşlıq strategiyası sayəsində ölkəmiz enerji təhlükəsizliyi ilə yanaşı, nəqliyyat-logistika, rəqəmsal bağlantılar və yüksək texnologiyalar kimi yeni sahələrdə də qlobal tərəfdaşlarla gündəm formalaşdıran mövqeyə yüksəlib”, - deyə A.Kərimli vurğulayıb. (AZƏRTAC)