• Bu gün Azərbaycanın işğaldan azad olunmuş bölgələrindən biri olan Kəlbəcər şəhərinin günü qeyd olunur. 30 il davam edən erməni işğalı nəticəsində viran qoyulan şəhər və kəndlərimiz hazırda Prezident İlham Əliyevin rəhbərliyi ilə sürətlə yenidən qurulur. Azad olunmuş ərazilərin bərpası, məskunlaşma və iqtisadi inkişaf istiqamətində mühüm addımlar atılır.

Bu barədə Milli Məclisin deputatı Vüqar Bayramov məlumat verərək bildirib ki, artıq Qarabağ və Şərqi Zəngəzurda 62 mindən çox insan yaşayır, fəaliyyət göstərir və təhsil alır. 2025-ci ilin sonunadək bu sayın 140 min nəfərə çatacağı gözlənilir.

Deputat əlavə edib ki, Azərbaycan Prezidenti cənab İlham Əliyev və birinci vitse-Prezident Mehriban xanım Əliyevanın rəhbərliyi və qayğısı ilə işğaldan azad olunan ərazilərimizin bərpası, inkişafı və iqtisadiyyatın reinteqrasiyası sürətlə davam etdirilir:

"Son 5 ildə dövlət başçısı işğaldan azad olunmuş ərazilər üzrə 569 tədbirdə iştirak etmiş, 177 müxtəlif təyinatlı layihənin təməlini qoymuş, 167 obyektin və infrastruktur layihəsinin açılışını etmişdir.

Qarabağ və Şərqi Zəngəzurda yaradılan sənaye parkları həmin ərazilərimizin inkişafını stimullaşdırmaqla yanaşı, ölkəmizdə qeyri-neft sektorunun inkişafına artıq xüsusi töhvə verməkdədir. “Ağdam” və “Araz Vadisi İqtisadi Zonası” Sənaye parklarında 50 rezident və 7 qeyri-rezident müəssisə qeydiyyata alınıb. Ümumi dəyəri 454 milyon manat olan layihələrin icrası çərçivəsində 185 milyon manat investisiya yatırılıb və 1057 iş yeri yaradılıb". V.Bayraov vurğulayıb ki, Ağdam Sənaye Parkında istehsal edilən məhsulların 39,5 milyon manatlıq hissəsi ixrac olunub.  Bu o deməkdir ki, artıq Qarabağda istehsal olunan məhsullar dünya bazarlarına çıxarılmaqdadır. Bu isə Qarabağın qısa zamanda Azərbaycanda iqtisadi inkişafın əsas drayverlərindən birinə çevriləcəyindən xəbər verir.

Azərbaycan dövlət büdcəsindən Qarabağ və Şərqi Zəngəzurun bərpasına 23 milyard manata yaxın vəsait ayrılıb. Gələn il dövlət büdcəsindən işğaldan azad olunan ərazilərimizin bərpasına 3.5 milyard manat vəsaitin yönəldilməsi nəzərdə tutulur. Qarabağ və Şərqi Zəngəzur daxili maliyyə mənbələri hesabına qurulur və inkişaf  etdirilir.

Tahirə AĞAMİRZƏ