14.04.2022, 08:34 452
Vətən Müharibəsi şəhidi, tank komandiri, leytenant, şair Murad Nağıyevin həyatından, döyüş yolundan və şeirlərindən bəhs edən “Murad” adlı kitab ailə üzvləri tərəfindən Respublika Uşaq Kitabxanasına hədiyyə edilib.
“Murad” adlı kitabda 44 günlük Vətən müharibəsində misilsiz qəhrəmanlıqlar göstərən şəhid leytenant, tank komandiri, şair Murad Nağıyevin keçdiyi döyüş yolundan bəhs olunur. Kitab “Ön söz”ündən tutmuş “Son söz”ünə qədər sətir-sətir, duyğu-duyğu, məna-məna qəhrəman, gənc və istedadlı şair Murad Nağıyevin öz taleyidir.
Şəhidin həyat və döyüş yolundan bəhs edən kitabda, ailəsinin, dostlarının, döyüş yoldaşlarının, müəllimlərinin onunla bağlı xatirələri, həmçinin Murad Nağıyevin müəllifi olduğu şeirləri - cəbhədə olarkən qələmə aldığı sətirləri əks olunub.
Müharibənin ilk günündən döyüşə yollanan Murad Nağıyev Horadiz kəndinin alınmasında şücaət göstərib, Füzuli, Cəbrayıl, Hadrut və Zəngilanın düşmən işğalından azad edilməsində fəal iştirak edərək düşmənin strateji əhəmiyyətli obyektlərini, çoxsaylı texnikasını və canlı qüvvəsini məhv edib.
Murad Nağıyev 2020-ci il oktyabrın 11-də Cəbrayıl uğrunda gedən döyüşlərdə şəhid olub. İkinci Fəxri xiyabanda dəfn olunan şəhid leytenant Murad Nağıyev vəfatından sonra “Vətən uğrunda” və “Cəbrayılın azad olunmasına görə” medalları ilə təltif edilib. (AZƏRTAC)
