26.12.2023, 14:58 320
- Qərbi azərbaycanlıların özünəməxsus mədəniyyəti, incəsənəti, folkloru və ədəbiyyatı var. Qərbi Azərbaycanın Ağbaba mahalından olan elə bir ailə tapılmaz ki, orada folklor, qədim adət və ənənələrimiz qorunub saxlanılmasın. Bu qədim Azərbaycan torpağından deportasiya edilmiş soydaşlarımız illərdi ölkənin hansı ərazisində məskunlaşsa da genetik olaraq öz kökünə, tarixinə bağlıdırlar. Qərbi azərbaycanlıların toyda, düyündə qol-qola verib oynadıqları Ağbaba yallısının sədaları da bu insanların öz qədim adətlərinə, tarixinə necə sayğılı olduqlarını nümayiş etdirir.
Bildiyimiz kimi, yallı insanların cəsarətinin, birliyinin, həmrəyliyinin rəmzidir. Birliyimiz həm də itirdiyimiz torpaqlarımızı, yurd yerlərimizi qəlbimizdə, əməlimizdə yaşatmaqdan keçir. Qərbi azərbaycanlılar deyirlər ki, onlar öz yerindən, ata-baba yurdundan ayrı düşsələr də, tarixi kökündən, qədim adət-ənənələrindən ayrı düşməyiblər. Özgə torpaqlarında gözü olan nankor qonşularımız milli-mədəni sərvətlərimizi də oğurlamaq üçün həmişə pusquda dayanıblar. Elə Ağbaba yallısına da əl uzadıblar, ancaq onu özününküləşdirməyi bacarmayıblar...
Ağbaba yallısı nə vaxt yarandığı məlum olmasa da Qərbi Azərbaycanlıların ruhuna-qanına hopub. Böyükdən kiçiyə hamının sevə-sevə qol-qola oynadığı bu qədim rəqs soydaşlarımızın elə bir şənliyi, toy-düyünü olmaz ki, orada icra edilməsin. Bu il sentyabrın 3-də Mədəniyyət Nazirliyi tərəfindən Heydər Əliyev Mərkəzinin park ərazisində Qərbi Azərbaycanın etno-mədəni mühitinin, habelə qeyri-maddi mədəni irsinin nümayiş olunması məqsədilə “Qərbi Azərbaycanın etno-mədəni mühitinə səyahət” adlı tədbirdə konsert proqramının da “Ağbaba yallısı" ilə yekunlaşması təsadüfi deyil.
Mina RƏŞİD
