01.12.2025, 08:30 4
- Azərbaycanın iqtisad elminə dəyərli töhfələr verən, tanınmış Qarabağ ziyalısı, professor, Əməkdar Müəllim, “Şöhrət” ordenli Məhiş Əhmədovun 80 illik yubileyi qeyd olunub. Onun uzun illər ərzində elmi-pedaqoji fəaliyyəti, xüsusilə də iqtisadiyyatın inkişafı və planlaşdırılması sahəsində apardığı tədqiqatlar ölkəmizdə yüksək qiymətləndirilir.
Məhiş Əhmədov 28 noyabr 1945-ci ildə Ağdam rayonunun Qaradağlı kəndində anadan olub. 1951–1961-ci illərdə orta təhsil alıb, 1963-cü ildə Azərbaycan Dövlət Universitetinin (indiki Bakı Dövlət Universiteti) Xalq təsərrüfatının planlaşdırılması ixtisasına daxil olub və 1969-cu ildə həmin ixtisas üzrə ali təhsilini başa vurub.
Elmi fəaliyyətinə davam edən M.Əhmədov 1974-cü ildə “Elmi-texniki tərəqqi və ictimai istehsalın material tutumu” mövzusunda dissertasiya müdafiə edərək iqtisad üzrə fəlsəfə doktoru elmi dərəcəsini alıb. Daha sonra o, 2005-ci ildə “Qloballaşma şəraitində milli iqtisadiyyatın formalaşmasının problemləri” mövzusunda doktorluq işi müdafiə edərək, iqtisad elmləri doktoru adına layiq görülüb.
Professor Məhiş Əhmədovun çoxillik fəaliyyəti, geniş elmi irsi və yetirdiyi mütəxəssislər onun Azərbaycan iqtisadiyyatına verdiyi töhfələrin bariz nümunəsidir. Onun yubileyinin qeyd olunması da bu böyük xidmətlərə verilən dəyərin ifadəsidir.
Tahirə AĞAMİRZƏ
