27.11.2025, 16:54 215
- Azərbaycan elminin inkişafına əhəmiyyətli töhfələr vermiş alimlərimiz arasında ağdamlı ziyalı, kimya elmləri doktoru, professor Asif Məmmədovun xüsusi yeri var. Həyatını kimya elminə və gənc nəslin elmi potensialının formalaşmasına həsr edən alim, eyni zamanda Ağdamın yetirməsi olaraq bölgənin ziyalı simalarından biri kimi tanınır.
Asif Məmmədov 2 may 1947-ci ildə Ağdam şəhərində anadan olub. 1965-ci ildə 5 saylı orta məktəbi qızıl medalla bitirdikdən sonra Bakı Dövlət Universitetinin Kimya fakültəsində təhsil alıb. Universiteti fərqlənmə diplomu ilə başa vuran gənc alim elmi fəaliyyətini “Fiziki kimya” kafedrasının aspiranturasında davam etdirib.
Elmi axtarışları nəticəsində 1974-cü ildə namizədlik, 1990-cı ildə isə doktorluq dissertasiyasını müdafiə edib. Fəaliyyəti dövründə AMEA-nın müxtəlif institutlarında mühüm vəzifələrdə çalışıb, laboratoriya və bölmə rəhbəri kimi elmi tədqiqatlara rəhbərlik edib. Hazırda Kimya Problemləri İnstitutunun baş elmi işçisi olan professor Asif Məmmədov elmi ictimaiyyətin böyük hörmətini qazanıb.
Onun elmi fəaliyyətinə verilən dəyərin bariz nümunəsi kimi 60 illik yubileyi münasibətilə layiq görüldüyü Fəxri Fərmanı göstərmək olar.
Qeyd edək ki, vətənə və elmə sədaqətlə xidmət edən ziyalılarımızın nümunəvə fəaliyyəti dövlətimiz tərəfindən hər zaman yüksək səviyyədə qiymətləndirilir.
Tahirə AĞAMİRZƏ
