17.10.2025, 19:30 119
- Oktyabrın 17-də Səhiyyə Nazirliyinin təşkilatçılığı ilə işğaldan azad olunan ərazilərə “Böyük Qayıdış” Dövlət Proqramı çərçivəsində akademik Zərifə Əliyeva adına Milli Oftalmologiya Mərkəzinin Səyyar Klinikası Ağdərə rayonunun Suqovuşan qəsəbəsində əhali üçün oftalmoloji tibbi müayinələr aparıb.
Nazirliyin mətbuat xidmətindən verilən məlumata görə, aksiyanın başlıca məqsədi operativ şəkildə vətəndaşların müayinəsi, görmə qabiliyyətinin zəifləməsinin qarşısının alınması, görmə patologiyasının erkən diaqnostikasının aşkarlanması və müalicələrin təyin olunmasıdır.
Müayinələr əsasında vətəndaşlarda quru göz sindromu, allergik konyunktivit, refraksiya patologiyası, miopik astiqmatizm və digər xəstəliklər aşkarlanıb. Eyni zamanda, göz xəstəlikləri ilə bağlı ümumi monitorinqlər aparılıb və əldə edilən nəticələr müzakirə olunub. Həmçinin ciddi problemlərlə üzləşən və çətin əməliyyat tələb olunan pasiyentlərin akademik Zərifə Əliyeva adına Milli Oftalmologiya Mərkəzinə gəlmələrinə şərait yaradılıb.
Aksiya zamanı 120-yə yaxın Ağdərə rayonunun Suqovuşan qəsəbəsi və digər yaşayış məntəqələrinin sakinləri müayinələrdən keçiblər.(AZƏRTAC)
