07.10.2022, 14:47 519
- 30 illik bir zaman kəsiyində doğma el-oba həsrəti ilə yana-yana yaşadıq. Qəlbimizdə o yerlərə qayıtmaq, yurd salmaq arzusu bir an belə bizi tərk etmədi. İnsanlarda qürur hissi demək olar ki, xəcalətlə əvəzlənmişdi. Lakin aparılan hərbi-vətənpərvərlik tərbiyəsi gənclərimizin qəhrəmanlıq ruhunu coşdururdu. Nəhayət, 27 sentyabr 2020-ci ildə Azərbaycan Respublikası Silahlı Qüvvələrinin Ali Baş Komandanı cənab İlham Əliyevin əmri ilə əkshəmlə əməliyyatı başlandı. İgid ərənlərimiz düşmənə öz gücünü göstərdi. 44 günlük ölüm-dirim savaşı Zəfərlə başa çatdı. Bu mübarizədə qəhrəmanlıq göstərən oğullarımızdan biri də qazi Fərman Rafiq oğlu Quliyevdir.
Biz qazimizlə görüşüb onun həyat və döyüş yolu barədə maraqlandıq. Məlum oldu ki, valideynləri Zəngilan rayonundan olan Fərman Quliyev 31 mart 2001-ci ildə Bakı şəhəri, Sabunçu qəsəbəsində anadan olmuşdur. O, 2007-ci ildə Cəlal Məmmədyarov adına tam orta məktəbin birinci sinfinə daxil olub, 2016-cı ildə IX sinfi bitirərək kimyəvi analiz laborantı ixtisasına yiyələnmək üçün Bakı şəhəri 1 saylı liseyində 3 il oxuyub. 2019-cu ilin 29 iyulunda isə hərbi xidmətə çağırılıb. Həmin ilin avqustunda silahlı qüvvələrdə seçim aparılıb və Fərman XTQ-də xüsusi kurs keçib. 2020-ci ilin sentyabrın 27-də Fərmangilin dəstəsi də döyüşə qatılıb. Qəhrəman döyüşçümüz dostları Hüseynxan Səlimov, Səbuhi Nağıyev, İlyas Allahverdiyev, Kamran Şirinov və b. ilə birlikdə düşmənin başına od yağdırıblar. Qazimiz Füzuli, Cəbrayıl, Şuşa, Xocavənd rayonları və Laçın koridorunda igidlik göstərib. 2020-ci ilin noyabrında Şuşada sağ gözündən yaralanıb, başında isə qəlpələr var.
Bütün bu qəhrəmanlıqlara görə Azərbaycan Respublikasının Prezidenti cənab İlham Əliyevin sərəncamı ilə Fərman Quliyev «Hərbi xidmətdə fərqlənməyə görə», «Hərbi xidmətlərə görə», «Kəlbəcərin azad olunmasına görə», «Füzulinin azad olunmasına görə», «Cəbrayılın azad olunmasına görə» medalları ilə təltif olunub.
İsa MUSAYEV
