• Bu günlərdə Milli Qəhrəmanı Asif Məhərrəmovun (Fred Asifin) oğlu Azər Məhərrəmov armrestlinq (qol güləşi) üzrə Fransanın Dieppe şəhərində keçirilən dünya çempionatında mütləq qələbə qazanıb. Dünya çempionu adını qazanan Azərbaycan təmsilçisinin şərəfinə himnimiz  səsləndirilib. Bununla da idmançımız Amerikada keçiriləcək Dünya Arnold Classic yarışına vəsiqə qazanıb.

Məlumat üçün bildirək ki, Azər Məhərrəmov 1997-ci ildən idmanla məşğuldur. 1999-cu ildə ilk dəfə Osetiyada, 2000-ci ildə isə İstanbulda dünya çempionatında iştirak edib. Rusiyada 10 il ardıcıl çempion olub. Onun uğurları çoxdur. 

Onu da xatırladaq ki, idmançımız ötən ilin payızında PAL Vanderra çempionatında Ukraynanı təmsil edən erməni idmançı Hevorx Muradyan üzərində qələbə çalmışdı. "Arm Wrestling" liqasının kubokuna sahib olan Azər bu görüşdə tək idmançı kimi deyil, həm də vətənpərvər bir oğul kimi iştirak etmişdi. A.Məhərəmov mətbuta müsahibəsində söyləmişdi ki, o, bu yarışa hazırlaşmayıb və buna görə həmin görüşdən imtina etmək fikrində olub. Ancaq rəqibinin erməni olduğunu biləndə yarışda iştirak etmək qərarına gəlib: “Mənə bu haqda yarışın başlanmasına 25 gün qalmış məlumat verdilər. Həm xəstə olduğuma, həm də hazırlaşmadığıma görə görüşdən imtina etmək fikrindəydim. Erməni olmasaydı, getməyəcəkdim. Düşündüm ki, “ermənidən qorxub gəlmədi” deyərlər, ona görə də mütləq iştirak etmək lazımdır. Odur ki, Ukraynaya yolldandım”.

Sonra öyrənib ki, erməni idmançı Hevorx dörd ay onun yarışlarına baxıb məşq eləyibmiş. Amma onun bütün planlarını alt-üst edən idmançımız  qələbə çalıb və erməni rəqibinə söyləyib ki, zəifsən, get bir az da məşq elə...

A.Məhərrəmov deyir ki, rəqibimiz güclü də ola bilər. Ancaq biz yarışlara çıxanda ermənilərin törətdiklərini yada salıb, güləşirik. Bu, bizi bir az da güclü edir. Atam döyüş meydanında ermənini məğlub edirdi, övladı isə idman yarışlarında onlara yerini göstərir...

Milli Qəhrəman Asif Məhərrəmovun ruhu şad olsun. Onun igid oğlu, bayrağımızı dünyada zirvələrə qaldıran dünya çempionu Azər Məhərrəmova isə cansağlığı və uğurlar arzulayırıq.

Mina RƏŞİD