18.11.2024, 10:32 220
- Şəhid Məhəmməd Nadir İlqar oğlu Rzayevin adı əmisi Milli qəhrəman Nadir Rzayevin adından götürülüb. Belə ki, Birinci Qarabağ Müharibəsində əmisi Nadir Rzayev qəhrəmancasına şəhadətə ucalanda həmin ərəfədə o dünyaya gəlib. Doğrudan da, adın insanın taleyinə təsiri elə Məhəmməd Nadir Rzayevin də həyatında öz əksini tapıb. O, həmişə şəhid əmisinin adına layiq olmağa çalışıb və onun yarımçıq qalmış arzularının gerçəkləşməsi üçün əlindən gələni edib. Anası deyir ki, M.N.Rzayev bir gənc kimi şəxsi istəklərin arxasınca getməyib. Onun fikri-zikri ancaq şəhid əmisi, Polad Həşimov və Mübariz İbrahimov kimi qəhrəmanların yanında olub. Elə bu amal uğrunda da Vətən müharibəsinə qoşulub və torpaqlarımızın işğaldan azad edilməsində şücaətlər göstərərək şəhadətə ucalıb...
Bu gün Vətən müharibəsinin qəhrəman şəhidi Məhəmməd Nadir Rzayevin doğum günüdür. O, 18 noyabr 1994-cü ildə Sumqayıt şəhərində anadan olub. 2001-2012-ci illərdə Sumqayıt şəhər 17 saylı tam orta məktəbdə təhsil alıb.
Məhəmməd Nadir Rzayev 2012-ci ildə Azərbaycan Silahlı Qüvvələrinin sıralarında hərbi xidmətə yollanıb. O, 2014-cü ildən artıq Xüsusi Təyinatlı Dəstələrin tərkibində müddətdən artıq həqiqi hərbi xidmət qulluqçusu idi.
Azərbaycan Ordusunun əsgəri olan Məhəmməd Nadir Rzayev 2020-ci il sentyabrın 27-dən Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsində iştirak edib. Füzulinin və Cəbrayılın azadlığı uğrunda gedən döyüşlərdə mərdliklə vuruşaraq şücaətlər göstərib.
Məhəmməd Nadir Rzayev 15 oktyabr 2020-ci ildə Füzuli rayonu istiqamətində gedən qanlı döyüşlərdə qəhrəmancasına şəhadətə ucalıb.
Azərbaycan Prezidenti İlham Əliyevin müvafiq sərəncamlarına əsasən Məhəmməd Nadir Rzayev ölümündən sonra "Vətən uğrunda", "Füzulinin azad olunmasına görə" medalları ilə təltif edilib.
Cənnətdəki doğum günün mübarək, ruhun şad olsun, məzarın nurla dolsun, qəhrəman şəhidim!
Mina RƏŞİD
