• Ulu Öndər Heydər Əliyev demişdir: “İdman elə bir sahədir ki, idmançılarımız müxtəlif ölkələrdə yarışlarda iştirak edir, qələbələr qazanırlar və hər dəfə müstəqil Azərbaycanın adını ucaldırlar. Müstəqil Azərbaycanın himni çalınır, müstəqil Azərbaycanın bayrağı qaldırılır və müstəqil Azərbaycan dünyanın müxtəlif ölkələrində tanınır. Demək olar ki, idman kimi Azərbaycanın müstəqilliyinin rəmzlərini nümayiş etdirən ikinci bir vasitə yoxdur”.

Bu gün fəxrlə deyə bilərik ki, Ulu Öndərimizin davamçısı Prezident cənab İlham Əliyevin diqqət və qayğısı sayəsində Azərbaycan dünyanın inkişaf etmiş idman mərkəzlərindən birinə çevrilib. Bunu son illər bir çox idman yarışlarına ev sahibliyi etməyimiz, həm Avropa, dünya çempionatlarında və olimpiya oyunlarında yüksək nəticələr qazanmağımız bir daha sübut edir.

İslam oyunlarının qalibi, Avropa oyunlarının gümüş mükafatçısı, dünya kubokunun sahibi, 5 dəfə Avropa, 4 dəfə dünya çempionu və dəfələrlə beynəlxalq turnurlərin qalibi yunan-Roma güləşçisi İslam Abbasov da fəxr etdiyimiz idmançılarımızdandır. Əslən Qubadlı rayonundan olan İslam 1996-cı il martın 24-də  Sumqayıt şəhərində anadan olub. 2013-cü ildə Sumqayıtda 16 saylı tam orta məktəbi bitirib, elə həmin ildə Azərbaycan Dövlət Bədən Tərbiyəsi və İdman Akademiyasına qəbul olub. 2017-ci ildə isə oranı bitib. Sonra həqiqi hərbi xidmətə yollanıb. 2018-ci ildə əsgərlik xidmətindən qayıtdıqdan sonra yenidən idmanla məşğul olmağa başlayıb və öz üzərində müntəzəm çalışıb və çalışır.

İslam deyir ki, idmanı mənə atam sevdirib və hələ uşaq ikən məni Sumqayıtda idman məktəbinə yazdırmışdı. Onun böyük arzusu məni həmişə qalib idmançı kimi görmək olub. Onu da deyim ki, məşqçim Bahadır Həziyevdir və o isə mənə güləşin bütün sirlərini əyrədir.

Qeyd edək ki, 2021-ci ildə Prezident, Müzəffər Ali Baş Komandan İlham Əliyevin Qubadlıya səfəri zamanı çempionumuz da orada olub və Prezidenmtimizlə görüşüb.

Söhbət əsnasında idmançımız  xoş anlarla yadda qalan o görüşü xatırlayaraq deyir: -Qubadlını, gözəl diyarı görmək böyük arzum idi. Valideynlərimdən, yaşlı nəsillərdən doğma yurdumuz haqqında uşaq vaxtı eşitdiyim söhbətlər nağıl kimi, sirli-sehirli bir aləm kimi yaddaşımda qalmışdı. Şanlı ordumuzun işğaldan azad etdiyi Qubadlını görmək həvəsim daha da artmışdı, çox maraqlı idi  heç vaxt görmədiyim ata yurdumu görmək. Düzdür, düşmən orada bizə maddi və mənəvi zərər verərək rayonumuzu, kəndlərimizi darmadağın edib, bu ilk baxışdan bizi kövrəltsə də doğma yurdumuza qayıdıb hər şeyə yenidən başlamağın mümkünlüyü məni sevindirirdi...

Prezident İlham Əliyevlə hələ 2015-2017-ci illərdə müxtəlif tədbirlərdə qarşılaşsam da bir gün Onunla ata-baba yurdumuzda, Qubadlıda görüşəcəyimi ağlına belə gətirmirdim. Cənab Prezidentlə görüş mənə çox gözəl təsir bağışladı. O, mənə dedi: “Səni tanıyıram, səni izləyirəm,  və sənə inanıram. Gəlib burda idman sahəsində öz töhfəni verərsən”. Prezidentimizin mənim haqqımda belə müsbət fikirdə olması məni çox qürurlandırdı, mənə stimul verdi və eyni zamanda özümdə daha çox məsuliyyət hiss etdim. Bu sahəyə olan həvəsim iki qat artdı.

Ölkəmizin başçısı ilə səmimi görüşündən iftixarla söz açan idmançımız vurğuladı ki, o görüş çox qürurverici, möhtəşəm idi,  ölkə başçımızın tövsiyələri, məsləhətləri, tapşırıqları mənə güc verdi. Sonra əlavə etdi ki, ölkəmizin başçısı Qubadlının kəndlərini, müxtəlif yerlərini buranın sakinlərindən daha yaxşı tanıyır. Bizə kəndlərimizdə hansı idman komplekslərinin acılacağını, Qubadlıda olimpiya kompleksi tikiləndən sonra idmançıların gənclərə öz töhfəsini verəcəyini, rayona çəkilən yol və digər mühüm layihələr barədə bizi ətraflı məlumatlandırması məni həqiqətən də çox qürurlandırmışdı.

Mən də öz növbəmdə Prezidentimizin etimadını doğrultmağa çalışıram və qələbələrimlə Vətənimin başını hər zaman uca edəcəyəm.

Allahdan şəhidlərimizə rəhmət, qazilərimizə cansağlığı diləyən İslam Abbasov vurğuladı ki, mənim arzum şəhidlərimizin qanı axan Qubadlıya qayıdıb idman fəaliyyətimi orada davam etdirmək, gənclərə bu peşənin sirrlərini öyrətmək, güclü idmançılar yetişdirməkdir.

Qeyd edək ki, bu günlərdə Qubadlının fəxri, güləşçimiz İslam Abbasov (87kq) qızıl medal qazanıb.

İtalyanın paytaxtı Romada keçirilən Matteo Pellikone Güləş Türnirində İslam Abbasov (87 kq) ilk mərhələdə Estoniyalı Ranet Kaljoladan güclü olub - 5:0. Abbasov 1/4 finalda macar İştvan Takaçı yolundan kənarlaşdırıb - 10:4. İslam Abbasov yarımfinalda dünya ikincisi Aleks Kessidisə (İsveç) qalib gəlib - 2:0. Sumqayıt güləş məktəbinin yetirməsi finalda Macarıstanın digər təmsilçisi Erik Silvaşini sonuncu xal prinsipinə əsasən (1:1) üstələyərək, turnirin qalibi olub.

Tahirə AĞAMİRZƏ