01.11.2023, 08:43 220
- Azərbaycan Yazıçılar Birliyinin “Natəvan” klubunda şəhid atası, tanınmış şair, əməkdar müəllim Mirsəyyaf Zamanlının “Dərdin adamı” adlı növbəti şeirlər kitabının təqdimatı keçirilib.
Təqdimat mərasimində Kəlbəcər rayon İca Hakimiyyətinin başçısı Azər Qocayev, YAP Kəlbəcər rayon təşkilatının sədri Həbib Misirov, şairin qələm dostları, jurnalistlər, ziyalılar, ictimaiyyət nümayəndələri, oxucular və şairin ailə üzvləri iştirak edib.
Şəhidlərimizin əziz xatirəsi bir dəqiqəlik sukutla yad edildikdən sonra Kəlbəcər ədəbi mühitinin tədqiqatçısı, filologiya üzrə fəsləfə doktoru İlham Məmmədli şairin acılı-şirinli həyat yolundan, yaradıcılığından danışıb.
Tədbirdə çıxış edən Kəlbəcər rayon İcra Hakimiyyətinin başçısı Azər Qocayev şairi yeni kitabının işıq üzü görməsi münasibəti ilə rayon ictimaiyyəti və öz adından təbrik edib, ona yaradıcılıq uğurları arzulayıb.
Kitabın redaktoru Rübabə Sahib, Əməkdar jurnalist Əlövsət Ağalarov, yazıçı Seyran Səxavət, Həbib Misirov, şairlərdən Nəsib Nəbioğlu, Qəşəm Nəcəfzadə, Namiq Dəlidağlı, Rövşən Hüseynli, Qəzənfər Mənsimoğlu, İlham Qazaxlı, pedaqoq Həqiqət Şükürova, Novruz Nəbioğlu və başqaları çıxış edərək müəllifə ədəbi-bədii yaradıcılığında uğurlar arzulayıb, yeni kitabının işıq üzü görməsi münasibətilə onu təbrik ediblər.
Bədii qiraətçilər şairin şeirlərindən nümunələr söyləyib. Aşıq Ədalət Dəlidağlı öz ifasında şairin şeirlərinə müraciət edib.
Sonda Mirsəyyaf Zamanlı yeni şeirlərini oxuyub, oxucular üçün kitabını imzalayıb və tədbir iştirakçılarına öz minnətdarlığını bildirib.
Mina RƏŞİD
