24.10.2023, 10:00 336
- İkinci Qarabağ Müharibəsində qanı ilə tarix yazan oğullarımızdan biri də şəhid Akif Elxan oğlu Cabbarovdur. Bu gün qəhrəman şəhidimizin doğum günüdür. O, 1997-ci il sentyabrın 20-də Gədəbəy rayonunda dünyaya göz açıb. Orta məktəbi Şəmkir rayonu Könüllü kəndində bitirən Akif anası ilə birgə 2014–cü ildə Sumqayıt şəhərinə köçüb. Burada dayısı Möhübbət kişinin və onu anası kimi sevən Nigar xanımın evinə pənah gətirib. Akif uşaqlıqdan zəhmətə qatılıb, erkən yaşlarından anasına yardımçı olub. O, 2016-cı ildə hərbi xidmətə çağırılıb və Aprel döyüşlərində iştirak edib. Akif hərbi xidmətdə olarkən anasını itirib.
General Polad Həşimovun şəhid olması bütün vətənsevər gənclərimiz kimi Akifi də sarsıdıb. 2020-ci ilin avqust ayında Qarabağ yürüşünə qoşulan Akif könüllü olaraq Səfərbərlik və Hərbi Xidmətə Çağırış üzrə Dövlət Xidmətinə yazılıb. Sentyabrın 21-dən Daşkəsəndə təlimlərə cəlb olunub. Sentyabrın 27-də başlanan Vətən müharibəsinə Akif artıq hazır idi. O, Suqovuşan və Füzuli uğrunda mərdliklə döyüşüb. 2020-ci il oktyabrın 25-də Füzuli istiqamətində gedən qanlı savaşlarda qəhrəmancasına şəhadətə ucalıb. Şəhidimiz böyük izdihamla Sumqayıt Şəhidlər Xiyabanında torpağa tapşırılıb.
Ölkə başçısı Müzəffər Ali Baş Komandan İlham Əliyevin sərəncamları ilə şəhid Akif Cabbarov ölümündən sonra “Vətən uğrunda” və “Füzulinin azad olunmasına görə” medalları ilə təltif edilib.
Doğmaları deyirlər ki, Akif həmişə torpaqlarımızı azad etmək üçün sona qədər döyüşməyə hazıram, deyərdi. Müharibənin ilk günlərində evə tez-tez zəng edirdi və hamını bir–bir soruşurdu. Ümumiyyətlə, Akifin gözəl xasiyyəti vardı. İnanclı idi, dostluqda mərd oğlan olub. Elə bundandır ki, yoldaşları igid döyüşçünün şərəfinə Sumqayıtdakı “İnşaatçılar” yaşayış massivində, şəhidin evinin yanında xatirə bulağı yaradıblar.
Cənnətdəki doğum günün mübarək, məzarın nurla dolsun, qəhrəman Şəhidim!
Mina RƏŞİD
