04.09.2023, 09:28 352
- Bu gün Dövlət Sərhəd Xidmətinin Sərhəd Qoşunlarının kiçik giziri, kəşfiyyatçı, Vətən müharibəsinin şəhidi Səyyad Abdul oğlu Şıxıyevin doğum günüdür. O, 1999-cu il sentyabrın 4-də Saatlı rayonunun Qaralar kəndində anadan olub. 2018-2019-cu illərdə Dövlət Sərhəd Xidmətinin Zaqatala rayonunda yerləşən "N" saylı hərbi hissəsində müddətli həqiqi hərbi xidmət keçib. 2019-cu ilin noyabr ayından isə əvvəlcə Zaqatala rayonunda yerləşən "N" saylı hərbi hissədə, sonra isə Qax rayonunda yerləşən "N" saylı hərbi hissədə xidmət edib.
Azərbaycan Ordusunun Sərhəd Qoşunlarının kiçik giziri Səyyad Şıxıyev 2020-ci il sentyabrın 27-d Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Murov yüksəkliyi, Füzuli, Cəbrayıl, və Hadrut istiqamətlərində gedən döyüşlərdə şücaətlər göstərib. Onun düşmən bölməsinin arxasına sızaraq bir kəşfiyyatçı kimi əldə etdiyi məlumatlar ordumuzun işinə çox yarayıb.
Oktyabrın 11-dən 12-nə keçən gecə S.Şıxıyev Cəbrayıl istiqamətində gedən döyüşlərdə komandiri ilə birgə qəhrəmancasına şəhadətə ucalıb.
Şəhidimiz doğma Saatlı rayonunun Qaralar kəndində böyük izdihamla torpağa tapşırılıb.
Azərbaycan Prezidenti İlham Əliyevin Sərəncamlarına əsasən Səyyad Şıxıyev ölümündən sonra "Vətən uğrunda", "Cəbrayılın azad olunmasına görə" və 3-cü dərəcəli "Vətənə xidmətə görə" ordeni ilə təltif edilib.
Səyyad iki bacının yeganə qardaşı, ata-anasının gözünün işığı idi. Anası ciyərparasından ayrılığın acısına baxmayaraq övladının Vətənə sevgisi qarşısında heyrət etdiyini və onunla qürur duyduğunu deyir. Səyyadın iki bacısı da qardaşları ilə fəxr edir.
21 yaşlı qəhrəman kəşfiyyatçı Səyyad Şıxıyevlə nəinki doğmaları bu gün bütün Azərbaycan qürur duyur.
Cənnətdəki doğum günün mübarək, məzarın nurla dolsun, Səyyad balamız!
Mina RƏŞİD
