Bunu İqtisadi İslahatların Təhlili və Kommunikasiya Mərkəzinin (İİTKM) icraçı direktoru, iqtisad elmləri doktoru, professor Vüsal Qasımlı REAL TV-nin “Mir Şahin vaxtı” proqramında 2022-ci ilin nəticələrindən danışarkən deyib. O, qeyd edib ki, Baş nazirin tapşırığı əsasında, ilk dəfə olaraq, Dövlət Proqramında nəzərdə tutlan tədbirlərin icrasına nəzarəti rəqəmsal formatda həyata keçirəcəyik. “Bu, təkcə Azərbaycanda yox,postsovet məkanında birinci haldır,” – deyən Vüsal Qasımlı bildirib ki, işaldan azad edilmiş ərazilərin interaktiv xəritəsi qurulacaq, bütün infrastruktur obyektləri xəritədə öz əksini tapacaq, hətta iri obyektlərdə videokameralar quraşdırılacaq. Mərkəzin direktoru vurğulayıb ki, bu real vaxt rejimində nəzarət mexanizmidir. Onun sözlərinə görə, Estoniya istisna olmaqla, Avropa ölkələrinin heç birində belə mexanizm yoxdur. Azərbaycan bu qabaqcıl təcrübəni monitorinq-qiymətləndirmə institutunun timsalında tətbiqinə başlayır.
Xatırladaq ki, “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”nın təsdiq edilməsi haqqında Azərbaycan Respublikası Prezidentinin 16 noyabr 2022-ci il tarixli Sərəncamına əsasən,
Dövlət Proqramında nəzərdə tutulmuş tədbirlərin icrasının monitorinqini və qiymətləndirilməsini, Azərbaycan Respublikası Nazirlər Kabinetinin sifarişi əsasında, İqtisadi İslahatların Təhlili və Kommunikasiya Mərkəzi həyata keçirəcək. Həmin Sərəncamın icrasının təmin edilməsi barədə dövlətimizin başçısının 30 dekabr 2022-ci il tarixli Sərəncamı ilə Mərkəzə və Dövlət Proqramında nəzərdə tutulmuş işlər üzrə əsas icraçı orqanlara (qurumlara) müvafiq tapşırıqlar verilib.