• “Bakıda və İrəvanda görüşdüyümüz erməni nümayəndələrinin Qarabağ problemi və Azərbaycan-Ermənistan münasibətləri haqqında keçmişdə yazdığı fikirlə bizə tanışdır. Onların vaxtilə sosial şəbəkələrdə paylaşdıqları postları mənə də göndərirlər”.

“Vətən səsi” xəbər verir ki, bunu politoloq, Cənubi Qafqaz Tədqiqatlar Mərkəzinin direktoru Fərhad Məmmədov Azərbaycan və Ermənistanın ictimai təşkiulatlarının təmsilçilərinin "Sülh körpüsü" təşəbbüsündən danışarkən deyib. İctimai Televizyayada yayımlanan "Diqqət Mərkəzi" verilişinin qonağı olan siyasi şərhçi birincisi İrəvanda, ikincisi isə Bakıda keçirilən ilk iki görüş barədə təəssüratlarını bölüşüb. Onun sözlərinə görə, “Sülh körpüsü” çərçivəsində görüşdükləri erməni nümayəndələr arasında
44 günlük müharibə dövründə və müharibədən sonra sərt fikirlərlə çıxış edənlər də vardı: “Onlardan biri Kəlbəcər işğaldan azad ediləndə yazmışdı ki, həmin əraziləri minalamaq və nüvə tullantılarını orada basdırmaq lazımdılr. Amma indi görürük ki, onların mövqeyi dəyişib. “Sülh körpüsü” çərçivəsində qarşılıqlı təmasların da məqsədi yeni reallıqları onlara başa salmaqdır”.

 Müharibə dövründə həm Azərbaycan, həm də Ermənistan tərəfdən qarşılıqlı ittihamlar, sərt ritorik fikirlər səsləndirilidiyini xatırladan Fərhad Məmmədov hesab edir ki, indiki reallıqlar fərqli yanaşmalar tələb edir. Onun sözlərinə görə, nə qədər çətin olsa belə, erməni ictimaiyyətini sülhə hazırlamaq və onları yeni reallıqlara inandırmaq həm də Azərbaycanın üzərinə düşür: “Bəli, müharibə dövründə bir-birimizə qarşı əks mövqelərdə olmuşuq, bu, təbiidir. Şəxsən mənim də bəyanatım olub ki, biz Ermənistan ərazisini vurmalıyıq. Ermənilər Mingəçeviri raket atəşinə tutanda deyirdim ki, biz də Ermənistandakı “Abovyan” yeraltı anbarını partlatmalıyıq. Yəni, müharibə vaxtı emosiyalar var idi və qarşılıqlı bəyanatların şahidi olurduq. Amma indiki şəraitdə Azərbaycanın məqsədi Ermənistan cəmiyyətinin sağlamlaşdırmaqdır. Biz Ermənistanla sağlam və normal münasibətlərin qurulmasının tərəfdarıyıq”.

Ekspertin fikrincə, hazırda erməni ictimaiyyəti Paşinyan hakimiyyətinin məcburi şəkildə razı olduğu sülh gündəliyini qəbul edir və reallıqları Ermənistan cəmiyyətinə çatdırmağa çalışır. Onun sözlərinə görə, həmin şəxslər “Qarabağ Azərbaycandır!” devizini qəbul edən Ermənistan rəhbərliyinin yürütdüyü siyasəti dəstəkləyir: “Əgər onlar Azərbaycanın müəyyən etdiyi şərtlərlə sülh gündəliyini irəli aparırsa və bu gündəliklə sülh prosesinə qoşulursa bunu ən azı bir cəhd olaraq dəyərləndirəli, prosesi daha da irəli aparmağa çalışmalıyıq. Məqsəd bu gündəliyi Ermənistanda daha çox insanın qəbul etməsinə nail olmaqdır”.

Elxan SALAHOV