• Ermənistanın bir qrup siyasi xadimi, ictimai təşkilatların nümayəndələri və jurnalistlər Baş nazir Nikol Paşinyanın cinayət məsuliyyətinə cəlb olunması tələbi ilə prokurorluğa müraciət edib.

"Vətən səsi" xəbər verir ki, bu barədə Ermənistan mətbuatı məlumat yayıb. Prokurorluğa göndərilən rəsmi müraciətdə bildirilir ki, 2026-cı il seçkiləri ərəfəsində Paşinyanın başçılıq etdiyi hakimiyyət siyasi rəqiblərə və hökuməti tənqid edən şəxslərə qarşı repressiya kampaniyasına başlayıb. Son vaxtlar sərt xarakter alan bu cür kampaniyaların vətəndaşların hüquq və azadlıqlarının kobud şəkildə pozulması ilə müşayiət olunduğu deyilir. O da qeyd edilir ki, qanunsuz təqiblərin əsas hədəfinə Erməni Apostol Kilsəsi, katolikos, yüksək rütbəli digər din xadimləri, habelə ruhaniyyətin hüquqlarını müdafiə edən tanınmış iş adamı Samvel Karapetyan və çoxsaylı digər ictimai xadimlər çevrilib.

Hökumətin həyata keçirdiyi sərt cəza tədbirlərinə qarşı çıxan ictimaiyyət nümayəndələri deyirlər ki, hakimiyyət Erməni Apastol Kilsəsinin özünüidarə prinsipini, mülkiyyət hüquqlarını kobud şəkildə pozur. Bəzi xüsusi xidmət orqanlarının rəhbər vəzifəli məmurları isə səlahiyyətlərindən sui-istifadə edərək kilsənin daxili işlərinə müdaxilə edir, şəxsi və ailə həyatının toxunulmazlığını, insanların şərəf və ləyaqətini pozur.

Müraciətin müəllifləri bəyan edirlər ki, Ermənistanda baş verən bütün bu pozuntulara görə Nikol Paşinyan özü məsuliyyət daşıyır. İddia olunur ki, bu prosesləri Baş nazir şəxsən yönləndirir, tapşırıqlar verir və həyata keçirilən tədbirlərin icrası barədə vaxtaşırı hesabatlar tələb edir. Sənəddə Paşinyanın icra hakimiyyəti və məhkəmə sistemi üzərində böyük təsiri nəzərə alınaraq onun fəaliyyəti dövlət sisteminin hüquqi fəaliyyətinə, demokratiyaya, vətəndaş azadlıqlarına və insan hüquqlarına birbaşa təhlükə yaratdığı da vurğulanır.

Müraciət müəllifləri ölkənin Baş prokurorundan öz səlahiyyətləri çərçivəsində Konstitusiyada və qanunlarda  nəzərdə tutulan tədbirləri görməyi tələıb edir. Onlar Baş nazir Nikol Paşinyanın və onun qanunsuz sifarişlərini yerinə yetirən şəxslərin cinayət məsuliyyətinə cəlb olunmasını istəyir.

Xatırladaq ki, həmin müraciəti 16 nəfər imzalayıb. Onların arasında "Helsinki Assosiasiyası"nın nümayəndəsi Arman Veziryan, jurnalist Tiqran Paskeviçyan, "Aravot" qəzetinin baş redaktoru Aram Abramyan, Jurnalistlər İttifaqının rəhbəri Satik Seyranyan, "Həyat naminə ölkə" partiyasının nümayəndəsi Araksya Qriqoryan, "Yeni güc" partiyasından Aram Torosyan, "Hayakve" təşəbbüsündən Armen Manvelyan və Ermənistan Milli Konqresi partiyasının sədr müavini Levon Zurabyan da var.

Elxan SALAHOV