03.04.2025, 14:52 211
- 2023-cü ilin sentyabrında Qarabağda keçirilən antiterror tədbirlərindən dərhal sonra ləğv edilmiş qondarma separatçı rejimin “ordu”sundakı rəhbərlərdən biri Ermənistanın sabiq prezidenti Serj Sarkisyan olub.
"Vətən səsi" xəbər verir ki, bunu Bakı Hərbi Məhkəməsində təqsirləndirilən şəxs David İşxanyan bildirib. O, aprelin 3-də davam etdirilən məhkəmə prosesində dövlət ittihamçılarının suallarını cavablandırarkən qondarma rejimin “ordu”sunun idarə olunmasının “özünümüdafiə komitəsi” tərəfindən həyata keçirildiyini bildirib: “Rəhbərlər Serj Sarkisyan və Samvel Babayan idi. Amma idarəetmə mexanizmi ilə bağlı bir şey deyə bilmərəm”.
Birinci Qarabağ müharibəsində Serj Sarkisyanın roluna dair açıqlama verən İsxanyan onu növbəti dəfə ifşa edib. O, bildirib ki, həmin dövrdə separatçı rejimin “ordu”suna göstərş verən şəxslərdən biri məhz Sarkisyan olub.
Xatırladaq ki, Ermənistanın hərbi təcavüzü nəticəsində sülh və insanlıq əleyhinə cinayətlər, müharibə cinayətləri, o cümlədən təcavüzkar müharibənin hazırlanması və aparılması, soyqırımı, müharibə qanunlarını və qaydalarını pozma, habelə terrorçuluq, terrorçuluğu maliyyələşdirmə, hakimiyyəti zorla ələ keçirmə, onu zorla saxlama və digər çoxsaylı cinayətlər törətməkdə təqsirləndirilən Ermənistan vətəndaşlarının məhkəməsi davam etdirilir.
Elxan SALAHOV
