13.05.2024, 17:56 194
- Ermənistan Azərbaycan arasında sərhədlərin delimitasiyası 1980-1984-cü illərin topoqrafik xəritələri əsasında aparılır.
"Vətən səsi" xəbər verir ki, bu barədə Ermənistandakı “Şərəfim var” fraksiyasının katibi Tiqran Abramyan bildirib. O, delimitasiya ilə bağlı 1980-ci illərin topoqrafik materiallarına giriş əldə etdiyini, hətta hərbi topoqrafik xidmətin rəisi ilə görüşərək indiki delimitasiyanın hansı xəritələr əsasında aparıldığını iddia edib.
Abramyan bildirib ki, Ermənistan və Azərbaycan SSR arasında sərhədin delimitasiyası və demarkasiyasına dair 1984-88-ci il sənədləri Müdafiə Nazirliyinin sərəncamındadır, lakin indiki delimitasiya prosesində onlardan istifadə edilməyib. Onun sözlərinə görə, bu illərə aid materiallar “məxfi” qrifi ilə saxlanılır, buna görə də erməni cəmiyyəti üçün onlar əlçatmazdır: “Mənə bu sənədlərin niyə məxfi qaldığı və hansı əsaslarla klassifikasiya edildiyi barədə tutarlı dəlillər təqdim olunmayıb. Təəccüblüdür ki, Ermənistanın indiki sərhədləri qanunla sirr olmasa da, 1988-ci il sərhədləri hələ də möhürlənmiş sirr olaraq qalır. Bu, xüsusilə qəribədir, nəzərə alsaq ki, Paşinyanın fikrincə, bu sənədlər hüquqi qüvvəyə malik deyil”.
Qeyd edək ki, bir müddət öncə o vaxt Noyemberyan (Barana) polis idarəsinin, 1989-cu ildən Daxili İşlər Nazirliyinin İctimai Asayişin Mühafizəsi İdarəsinin rəisi olmuş polkovnik Paykar Qalumyan bu mövzuya toxunmuş, 1985-87-ci illərdə delimitasiya işlərinin aparıldığını bildirmiş, 1988-ci ilin 12 yanvarında bununla bağlı sənəd imzalandığını xatırlatmışdı. Qalumyan demişdi ki, bu sənədlə Azərbaycandan 14,5 min hektar ərazi qoparılıb.
Elxan SALAHOV
