08.11.2022, 07:20 764
Mina RƏŞİDin şeirləri...
HƏR ŞƏHİD BİR BAYRAQDI
Bu ana Vətənimin
Haqq səsidi Şəhidlər.
Min bir adın içində
Müqəddəsdi Şəhidlər!
Şəhid oldu oğullar
Vətən yaşasın deyə.
Qarabağ azad olub
Haqqa qovuşsun deyə
Şəhidlərin adları
Bütün eli dolandı.
Bayrağımız Şuşada,
Laçında dalğalandı...
O quruca torpağın,
Daşın sağ olsun, Vətən!
Hər Şəhid bir bayraqdı
Başın sağ olsun, Vətən!
ZƏFƏR GÜNÜN MÜBARƏK!
Sən yenidən doğuldun,
Bu gün sənin günündü.
Bu gün bizim günümüz,
Bu gün mənim günümdü.
Haqq, ədalət nişanı
Qanadlanır bayrağım.
Bu gün bütün dünyada
Dalğalanır bayrağım.
Bütün türk dünyasının
Üzü gülür bu gündə.
Biz Zəfər qazanmışıq
Sevinir ay da, gün də!
Ali baş komandanım
Dincəlmədi bir an da.
Hərə bir əsgər olub
“Dəmir yumruq” olanda...
Bütün dünya gördü ki,
Haqqın öz divanı var.
Şəhidlər al qanıyla
Böyük tarix yazdılar.
Sinəsini yurduma
Qurban edən oğullar.
Başınıza dolanım,
Qazilər – uca dağlar!
Kövrəlirəm, həm də ki,
Qürurlanır ürəyim...
Azərbaycan anamdı,
Qarabağ göz bəbəyim.
Nələr çəkdi başımız
Unutmayaq heç gərək.
Gözlərin aydın, Vətən,
Zəfər günün mübarək!
Zəfər günüm mübarək!
ŞƏHİD ATASI
Doğum günün mübarək,
Nahid balam, necəsən?
Ürəyimin parası,
Şəhid balam, necəsən?
Bulud kimi dolub, bax,
Anan da, "Salam!"- deyir.
Bacı-qardaşların hey,..
Hey səni əzizləyir.
Şəhidlər ölmür, uca
Zirvədə qarsan, oğlum!
Fəxr edirəm səninlə
Nə yaxşı varsan, oğlum!
